ބޮލީވުޑްގެ މަޝްހޫރު އެކްޓްރެސްއެއް ކަމަށްވާ އަދިތީ ރާއޯ ހައިދަރީއާއި އޭނާގެ ފިރިމީހާ ސިދުހާތު ދެވަނަ ފަހަރަށް ކައިވެނި ކޮށްފި އެވެ.

މިއަހަރުގެ މާޗު މަހުގެ 28 ވަނަ ދުވަހު އެންމެ ފުރަތަމަ ކައިވެނި ކުރި އެ ދެމީހުން އަލުން ކައިވެނި ކޮށްފައިވަނީ މީގެ ދެތިން ދުވަސް ކުރިން އިންޑިއާގެ ރާޖަސްތާނުގަ އެވެ. އެ ކައިވެނި ހަފްލާގެ ފޮޓޯތައް މިހާރު އިންޓަނެޓުގައި ދައުރުވަމުން އަންނައިރު އެ ކައިވެނީގެ ފުރިހަމަ ކަމަށް އާއްމުންގެ ތައުރީފު އަންނަނީ އޮހެމުންނެވެ.

އެގޮތުން ކައިވެނީގައި ދެމީހުން ވެސް ލައިގެން ތިބީ އިންޑިއާގެ އެންމެ މަޝްހޫރު އެއް ޑިޒައިނަރު ކަމަށްވާ ސަބްޔާސަޗީގެ ދެ ހެދުމެވެ. އަދިތީ ރަތް ކުލައިގެ ހެދުމެއްގައި ހުރިއިރު ސިދްހާތު ހިޔާރުކުރީ ކުކުޅު ބިސް ކުލައިގެ ކުރުތާ އެކެވެ.

ތެލުގޫ ފިލްމެއް ކަމަށްވާ "މަހާ ސަމުދްރަމް"ގެ ސެޓުން 2021 ވަނަ އަހަރު ބައްދަލުވި އަދިތީއާއި ސިދްހާތު ކައިވެނި ކޮށްފައިވަނީ ތިން އަހަރު ވަންދެން ލޯބީގެ ގޮތުން ގުޅިގެން އުޅުމަށްފަހު އެވެ.

ސިދުހާތުއާ ކައިވެނި ކުރުމުގެ ކުރިން އަދިތީ ވަނީ ވަކީލެއް ކަމަށްވާ ސަތުޔަދީޕް މިޝްރާއާ 11 އަހަރު ވަންދެން ކައިވެނި ކޮށްގެން އުޅެފަ އެވެ.

ހަބަރުތައް ބުނާ ގޮތުގައި އަދިތީ އޭނާގެ ފުރަތަމަ ކައިވެނި ކޮށްފައިވަނީ އުމުރުން އެންމެ 17 އަހަރުގަ އެވެ. އެ ކައިވެންޏާ ބެހޭ ގޮތުން އަދިތީ އާއްމުކޮށް ވާހަކަ ނުދެއްކި ނަމަވެސް 2013 ވަނަ އަހަރު އޭނާ ވަނީ އެ ދެމީހުން ވަކިވިކަން ޔަގީން ކޮށްދީފަ އެވެ.