ސިޔާސީ ޕާޓީތަކުން ބޭނުންވެއްޖެ ހާލަތެއްގައި ރައްޔިތުން އިންތިހާބުކޮށްފައިވާ މަޖިލިސް މެމްބަރުންގެ ގޮނޑި ގެއްލޭގޮތަށް ކަނޑައަޅައި ގާނޫނުއަސާސީއަށް ގެނައި އިސްލާހާ ގުޅިގެން ތަޖުރިބާކާރު ގާނޫނީ ވަކީލު އަލީ ހުސައިން ހުށަހެޅި މައްސަލަ ނުބަލައި ސުޕްރީމް ކޯޓުން ރިސެސްއަށް ގޮސްފި އެވެ.

އަލީ ހުސައިން ހުށަހެޅި މައްސަލަ ސުޕްރީމް ކޯޓުން ވަނީ ބަލައިގެންފަ އެވެ.

ސުޕްރީމް ކޯޓުން މިއަދު ބުނީ ކޯޓްތަކުގެ ގާނޫނުގެ ހަތް ވަނަ މާއްދާގައިވާ ގޮތުގެމަތިން، މާދަމާ އިން ފެށިގެން މި އަހަރުގެ އެ ކޯޓު އޮންނާނީ ރިސެސްގައި ކަމަށެވެ.

ކޯޓުތަކުގެ ގާނޫނުގެ ހަތް ވަނަ މާއްދާގެ (ނ) އާއި (ރ)ގައި ބަޔާންކޮށްފައިވާ ހާލަތުގެ އިތުރަށް، ގާނޫނުއަސާސީ ނުވަތަ ގާނޫނެއްގެ ދަށުން ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހޭކަމަށް ބަޔާންކޮށްފައިވާ ހާލަތްތައް ފިޔަވައި، ރިސެސްގެ މުއްދަތުގައި ސުޕްރީމް ކޯޓުގެ ޝަރީއަތުގެ އެއްވެސް އަޑުއެހުމެއް ނޯންނާނެ ކަމަށް އެ ކޯޓުން ބުންޏެވެ.

ސުޕްރީމް ކޯޓުގެ ރިސެސްގެ މުއްދަތުގައި މައްސަލަތަކުގެ ޝަރީއަތުގެ އަޑުއެހުން ނުބޭއްވި ކަމުގައިވީ ނަމަވެސް، ކޯޓަށް މައްސަލަތައް ބަލައިގަތުމާއި، އެނޫންވެސް އިދާރީ މަސައްކަތްތައް މެދުކެނޑުމެއްނެތި ކުރިއަށްދާނެ ކަމަށް އެ ކޯޓުން ބުންޏެވެ.

ކޯޓްތަކުގެ ގާނޫނުގެ ހަތް ވަނަ މާއްދާގެ (ނ)ގައި ބުނެފައި ވަނީ އެކަށީގެންވާ ހަލުވިމިނުގައި މައްސަލަތައް ކުރިއަށްގެންދިޔުމުގެ ބޭނުމުގައި އެ ކޯޓުގެ ފަނޑިޔާރުންގެ އަޣްލަބިއްޔަތުން ނިންމައިފިނަމަ ރިސެސްގެ މުއްދަތުގައި ވެސް މައްސަލަތައް ކުރިއަށްގެންދެވޭނެ ކަމަށެވެ.

ގާނޫނުއަސާސީއަށް ގެނައި އިސްލާހާ ގުޅޭ މައްސަލަ އެ ކޯޓަށް ހުށަހެޅިފައިވާއިރު، އެ އިސްލާހަކީ ގިނަ ބައެއްގެ ކަންބޮޑުވުން އޮތް އިސްލާހެކެވެ. އެކަމަކު އެ އިސްލާހާ ގުޅޭ މައްސަލަ އަވަހަށް ނިންމަން ސުޕްރީމް ކޯޓުން މަސައްކަތް ކުރާ ތަނެއް ނުފެނެ އެވެ.