އިމާމުން ތާޒާކުރުމަށް އިސްލާމިކް މިނިސްޓަރީން ކުރިއަށް ގެންދާ މަޝްރޫޢުގެ ދަށުން، މިހާތަނަށް 19 އަތޮޅަކުން 804 އިމާމުން ތަމްރީނުކޮށްފައިވާ ކަމަށް އެ މިނިސްޓްރީން ބުނެފި އެވެ.

އިމާމުން ތާޒާކުރުމުގެ ގައުމީ މަޝްރޫއަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން އިސްލާމިކް މިނިސްޓްރީން ކުރިއަށްގެންދާ ޕްރޮގްރާމެކެވެ.

މިނިސްޓްރީން ބުނީ އައްޑޫ ސިޓީގައި ކުރިއަށް ގެންދިޔަ އިމާމުން ތަމްރީން ކުރުމުގެ ޕްރޮގްރާމްގައި 68 އިމާމުން ބައިވެރިވެ ތަމްރީނު ފުރިހަމަކޮށްފައިވާ ކަމަށާއި މިއާއެކު މިހާތަނަށް 19 އަތޮޅަކުން ޖުމްލަ 804 އިމާމުން ތަމްރީނު ފުރިހަމަކޮށްފައިވާ ކަމަށް މިނިސްޓްރީން ބުނެ އެވެ.

އިސްލާމިކް މިނިސްޓްރީން ބުނީ އިމާމުން ތާޒާކުރުމަށް އެ މިނިސްޓަރީން ކުރިއަށް ގެންދާ މި ޕްރޮގްރާމުގައި ޖުމްލަ 9 މާއްދާއެއް ކިޔަވާދެމުން އަންނަ ކަމަށާއި އެގޮތުން ގުރުއާނާއި، ތަޖުވީދުގެ އިލްމާއި، ތަފްސީރާއި، ފިގުހާއި، ހަދީސްގެ އިތުރުން އަގީދާގެ އިލްމުގެ ދާއިރާއިން އިމާމުންނަށް ބޭނުންވާ މުހިންމު ކަންކަން އުނގަންނައިދޭނެ ކަމަށް އިސްލާމިކް މިނިސްޓްރީން ބުނެ އެވެ.

އިސްލާމިކް މިނިސްޓްރީން ބުނީ ސަރުކާރުގެ އެންމެ ބޮޑު އެއް އަމާޒަކީ އިމާމުން ތާޒާކުރުމުގެ ގައުމީ މަޝްރޫއުގެ ތެރެއިން މި އަހަރުގެ ނިޔަލަށް 700 އިމާމުން ތަމްރީންކުރުން ކަމަށެވެ.