މި އަހަރުގެ މިހާތަނަށް 655 ކިލޯގެ މަސްތުވާތަކެތި އަތުލައިގަނެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މި މައުލޫމާތު ހިއްސާކުރެއްވީ އަރިއަތޮޅު އުތުރުބުރިއާ މާލެ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގައި، އއ. ރަސްދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.

ރަސްދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގެ ތެރެއިން މަސްތުވާތަކެއްޗާ ދެކޮޅަށް މި ސަރުކާރުން ކޮށްފައިވާ މަސައްކަތުގެ ތަފާސް ހިސާބުތައް ހިއްސާކުރައްވަމުން ރައީސް މުއިއްޒު ވިދާޅުވީ މަސްތުވާތަކެތީގެ ވިޔަފާރި ހިންގާ ތަންތަން ބަލައިފާސްކުރުމުގެ އޮޕަރޭޝަން ވަރަށް ބޮޑަށް ފުޅާކޮށްފައިވާ ކަމަށެވެ. އެގޮތުން މި އަހަރުގެ މިހާތަނަށް މަސްތުވާތަކެތީގެ ވިޔަފާރިކުރަމުންދާ 13،430 ތަނެއް ބަލައި ފާސްކޮށްފައިވާ ކަމަށާއި އަދި 2022 ވަނަ އަހަރު 8581 ތަނެއް ބަލައި ފާސްކޮށްފައިވާ ކަމަށް ރައީސް ވިދާޅުވި އެވެ.

ރައީސް މުއިއްޒު ވިދާޅުވީ މިއަހަރުގެ މިހާތަނަށް އައިއިރު، 655 ކިލޯގެ މަސްތުވާތަކެތި އަތުލައިގަނެވިފައިވާ ކަމަށާއި އަދި އެތަކެތި މިހާރު ނައްތާލާފައިވާ ކަމަށެވެ. އަދި އަތުލައިގަތް ހުރިހާ މަސްތުވާތަކެއްޗެއް ނައްތާލާފައި ވަނީ ވެސް ނޫސްވެރިންގެ ކުރިމަތީގައި ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ މިދިޔަ އަހަރުގެ ނޮވެމްބަރާ ހަމަޔަށް އަތުލައިގަނެވިފައި ވަނީ އެންމެ 113 ކިލޯ މަސްތުވާތަކެތި ކަމަށާއި މިއަހަރު އަތުލައިގަތް މަސްތުވާތަކެއްޗަކީ މިދިޔަ އަހަރާއި އަޅައިބަލާއިރު ހަ ގުނަ އިތުރު އަދަދެއް ކަމަށް ރައީސް ވިދާޅުވި އެވެ.

"މި އަހަރު 655 ކިލޯގެ ޑްރަގު ކޮންފިސްޓިކޭޓް ކުރެވިއްޖެ. އެތަކެތި ނައްތާލައިފިން، ނައްތާލަނީ ވެސް ނޫސްވެރިންގެ ކުރިމަތީގައި، މިދިޔަ އަހަރު 2023 ގެ ނޮވެމްބަރާ ހަމަޔަށް ކޮންފިސްޓިކޭޓް ކޮށްފައިވަނީ އެންމެ 113 ކިލޯ. މިއަހަރު އަތުލައިގަތް މަސްތުވާތަކެއްޗަކީ މިދިޔަ އަހަރާއި އަޅައިބަލާއިރު ހަ ގުނަ އިތުރު އަދަދެއް،" ރައީސް ވިދާޅުވި އެވެ.

މިދިޔަ އަހަރުގެ ނޮވެމްބަރު މަހާއި ހަމައަށް އަތުލައިގަތް މަސްތުވާތަކެތީގެ އަގު 256 މިލިއަނަށް އަރާއިރު، މި އަހަރުގެ މިހާތަނަށް އަތުލައިގެން މަސްތުވާތަކެތީގެ އަގު 1.3 ބިލިއަން ރުފިޔާއަށް އަރާކަމަށް ރައީސް ވިދާޅުވި އެވެ.