ދިވެހި ރައްޔިތުންނަށް ލިބެމުން އަންނަ ސަބްސިޑީ، އާސަންދަ ރިޓަޔަމަންޓް ޕެންޝަން ފަދަ އެއްވެސް އެއްޗެއް ނުކަނޑާނެކަމަށާއި މި ސަރުކާރުން މަސައްކަތް ކުރައްވާނީ އެއަށް ވުރެ ރަނގަޅު އެއްޗެއް ރައްޔިތުންނަށް ހޯދައި ދިނުމަށް ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

އއ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތރުރުފުޅުގެތެރެއިން އެ އަތޮޅުގެ މަތިވެރި އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ރޭ ދެއްކެވި ވާހަކަފުޅުގައި ރައީސް ޑރ. މުއިއްޒު ވިދާޅުވީ ސަރުކާރުން މަސައްކަތް ކުރަނީ ދިވެހި ރައްޔިތުންނަށް މިހާރު ލިބެމުން އަންނަ އެއްވެސް އެއްޗެއް އުނިނުކޮށް ރައްޔިތުންނަށް ލިބޭ އާމްދަނީ އިތުރުކޮށް ދިނުމަށް ކަމަށެވެ.

އެގޮތުން މި އަންނަ އަހަރު ޕޭ ހާމަނައިޒޭޝަންގެ ތެރެއިން ސިވިލް ސާވަންޓުންނާއި ޝަރުއީ ދާއިރާގައި މަސައްކަތް ކުރާ މީހުންގެ މުސާރަތައް ބޮޑުވެގެން ދާނެ ކަމުގައި އެމަނިކުފާނު ވިދާޅުވިއެވެ. އަދި 2026 ވަނަ އަހަރު ދެން ހުރި ހުރިހާ ދާއިރާތަކެއްގެ މުސާރަތައް ބޮޑުވެގެންދާނެ ކަމަށް ވެސް ރައީސް ވިދާޅުވި އެވެ.

"ފައިސާ ޗާޕް ނުކޮށް، ރާއްޖެ ބަނގުރޫޓުވިޔަ ނުދީ، ގައުމަށް އިގްތިސާދީ ގޮތުން ތަރައްގީ ގެނެސްދެމުން، އުމްރާނީ ތަރައްގީގެ މަސައްކަތްތައް ހިންގަމުން ކުރިއަށް ދިއުން އެއީ އަޅުގަނޑުމެންގެ ސިޔާސަތަކީ. އެގޮތަށް އިރާދަކުރެއްވިއްޔާ އެއްވެސް ސަބްސިޑީއެއް، މިހާރު ލިބެމުންދާ އެއްވެސް ކަމެއް އުންޏެއް ނުވާނެ. އޭގެ ބަދަލުގައި ބޭކާރު ވަމުންދާ، ނާޖައިޒު ގޮތުގައި ކުރަމުންދާ ހަރަދުތައް ހުއްޓާލައި އުނިކުރަމުންދާނީ،" ރައީސް ވިދާޅުވި އެވެ.

ބޭހުގެ ވިޔަފާރި ކުރާ އެތައް ބަޔަކު އާސަންދައިގެ ތެރެއިން އެތައް އިންސައްތައެއްގެ ފައިދާ ނަގާފައި އަގު ބޮޑުކޮށް ބޭސް ވިއްކާކަން ފާހަގަކުރައްވާ ރައީސް ވިދާޅުވީ އެފަދަ ކަންކަން ހުއްޓުވުމުގެ މަސައްކަތް މި ސަރުކާރުން ކުރަމުންދާ އިރު، އެއީކީ ރައްޔިތުންނަށް އުނދަގުލެއްވާ ކަމެއް ނޫން ކަމަށާއި ރައްޔިތުންނަށް ލިބެމުން އަންނަ އެއްވެސް އާސަންދައެއް އުންޏެއް ނުވާނެ ކަމުގެ ޔަގީން ރައީސް ވަނީ ދެއްވާފަ އެވެ.