ސަރުކާރުގެ މައި ވިޔަފާރި ކުންފުނި، އެސްޓީއޯގެ ދަށުން ހިންގާ އެފްއެސްއެމް މެދުވެރިކޮށް ދޭ ތެލުގެ ހިދުމަތުން ބޮޑެތި ކޮރަޕްޝަންތައް ހިންގާފައިވާ ކަމުގެ ތުހުމަތުކޮށް، އެސްޓީއޯގެ ބޯޑު މެންބަރުން ހާޒިރުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފި އެވެ.

އެމްޕީއެލް އިން 2018 ވަނަ އަހަރުން 2019 ވަނަ އަހަރާ ދެމެދު ހިންގި އޮޕަރޭޝަންތަކަށް ބޭނުންވާ ޑީސަލް ގަތުމުގެ މުއާމަލާތްތަކާ ގުޅޭ ހާއްސަ އޮޑިޓު ރިޕޯޓާ މެދު މަޝްވަރާ ކުރުމަށް ބޭއްވި މާލިއްޔަތު ކޮމިޓީގެ ބައްދަލުވުމުގައި، މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވީ ތެލުން ވައްކަން ކުރުމަކީ މިހާރު ވެސް ހިނގަމުންދާ ކަމެއް ކަމަށެވެ.

އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، އެ ތެޔޮ ވިއްކައިގެން ލިބުނު ފައިސާ ލޯންޑާކުރި ކަމުގެ ތުހުމަތުގައި ހައްޔަރުކޮށްފައިވާ މައްސަލަ ފާހަގަކުރައްވާ ނާޒިމް ވިދާޅުވި އެފްއެސްއެމްގެ ތެރެއިން 50 މިލިއަން ރުފިޔާގެ ބޮޑު ހިޔާނާތެއް ހިންގާފައިވާ ކަމުގެ މައުލޫމާތު ލިބިފައިވާ ކަމަށެވެ.

އެސްޓީއޯގެ ބޯޑުގެ އޮޑިޓް ކޮމިޓީން ކުރި ތަހުގީގުން ވެސް މިކަން ހާމަވެފައިވާކަން ފާހަގަކުރައްްވާ ނާޒިމް ވިދާޅުވީ މި ތެލުން ކުރާ މި ވައްކަމަކީ މިއީ ރޭވިގެން އެންމެ ދަަށުން ފެށިގެން މެނޭޖްމަންޓާއި ހަމައަށް މޫލާފައި ހުރި ކަމެއް ކަމަށާއި އަދި ސަރުކާރު ހިއްސާވާ ކުންފުނިތަކުގެ ތެރޭގައި ކޮރަޕްޝަން އިންތިހާއަށް އިތުރުވެފައިވާ ކަމަށެވެ.

"ތެލުގެ ވައްކަން މިއީ ރޭވިގެން އެންމެ ދަށުން ފެށިގެން މެނޭޖްމަންޓާ ހަމައަށް މޫލައި، ރޭވިގެން ހިނގާ ކަމެއް. މިގޮތަށް ސަރުކާރު ހިއްސާވާ ކުންފުނިތަކުގެ ތެރޭގައި ކޮރަޕްޝަން އިންތިހާ އަށް ވަނީ އިތުރުވެފައި،" ނާޒިމް ވިދާޅުވި އެވެ.

މި މައްސަލައާއި ގުޅިގެން ނާޒިމް ހުށަހެޅުއްވީ އެސްޓީއޯގެ ބޯޑުގެ މެމްބަރުންގެ އިތުރުން އޮޑިޓް ކޮމިޓީގެ ބޭފުޅުން ކޮމިޓީއަށް ހާޒިރުކޮށް، އެ ހިޔާނާތުގެ މައުލޫމާތު ސާފުކުރުމަށެވެ. އެގޮތުން އޭނާ ހުށަހެޅުއްވި ގޮތަށް، ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ވަނީ ފާސްކޮށްފަ އެވެ.

އެސްޓީއޯގެ ތެލުގެ ހިޔާނާތުގެ މައްސަލައިގެ އިތުރުން، އެމްޕީއެލްގެ ތެލުގެ ހިޔާނާތާއި ފްލެޓު މަޝްރޫއުގައި އޮޑިޓުން ފާހަގަކޮށްފައިވާ ކޮރަޕްޝަނަށް މަގުފަހިވާ ކަންތައްތަކާ ގުޅިގެން މިހާރު އަޅާފައިވާ ފިޔަވަޅުތަކާއި ގެއްލިފައިވާ ފައިސާ އަނބުރާ ހޯދަން ކޮށްފައިވާ މަސައްކަތްތަކުގެ އަޕްޑޭޓެއް ހޯދަން، އެ ކުންފުނީގެ ބޯޑާއި ކަމާގުޅޭ ވެރިން ހާޒިރުކުރަން ވެސް މާލިއްޔަތު ކޮމިޓީން ވަނީ ފާސްކުރި އެވެ.

އޮޑިޓް އޮފީހުން އާންމުކުރި 2018-2020 ވަނަ އަހަރުގެ ރިޕޯޓުގައިވާ ގޮތުން އެމްޕީއެލް އިން 28 މިލިއަން ރުފިޔާގެ ތެލަށް ވަނީ ހިޔާނާތްތެރިވެފަ އެވެ. އެގޮތުން އެ ތިން އަހަރުގެ ތެރޭގައި 8.8 މިލިއަން ލީޓަރު ގަތުމަށް 90 މިލިއަން ރުފިޔާ ޖުމްލަ ހޭދަކުރި ކަމަށް ބުނެފައިވާއިރު، އެމްޕީއެލް އިން ޖުމްލަ ތެލަށް ހޭދަކުރި 30 ޕަސެންޓަކީ އޮޅުވާލައިގެން ކުރި ހޭދަ ކަމަށް އޮޑިޓް ރިޕޯޓުގައިވެ އެވެ.