ރައީސް މުހައްމަދު މުއިއްޒަށް ހައްދަން ޖެހޭނީ ކުރީގެ ރައީސް މުހައްމަދު އަމީން ދީދީއަށް ހެއްދެވި ގޮތް ކަމަށް ބުނެ އިދިކޮޅު އެމްޑީޕީން ޓެރަރިޒަމްގެ އަމަލެއް ހިންގަން ހިތްވަރު ދިން ކަމަށް ބުނެ، ސަރުކާރުގެ ސަމާލުކަމަށް ގެނެސް މައްސަލަ ބެލުމަށް ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބަލައިގެންފި އެވެ.

މި ކުއްލި މައްސަލަ ހުށަހެޅުއްވީ ނިލަންދޫ ދާއިރާގެ ޕީއެންސީ މެންބަރު ހަސަން މުފީދެވެ.

އެ ކުއްލި މައްސަލާގައި ބުނެފައިވަނީ އެމްޑީޕީގެ އެކި ޕޯޑިއަމްތަކުގައި ޓެރަރިޒަމްގެ އަމަލަކަށް ހިތްވަރުދީ, ވާހަކަ ދައްކާފައިވާ ކަމަށެވެ. އަދި އެކަން ތަހުގީގު ކުރުމަށް ކުއްލި މައްސަލާގައި ގޮވާލާފައިވެ އެވެ. އަދި އެއީ ޓެރަރިޒަމަށް ހިތްވަރުދިނުން ކަމަށާ އަދި ކަމަކީ ކަމާ ގުޅޭ މުއައްސަސާތަކުން ވަރަށް ސީރިއަސްކަމާ އެކު ވަގުތުން ބަލަން ޖެހޭ ކަމެއް ކަމުގައި އޭނާ ފާހަގަކުރެއްވި އެވެ.

މުފީދުގެ ކުއްލި މައްސަލާގައި އެފަދަ ވާހަކައެއް ފެތުރުމަކީ ވަކި ސިޔާސީ ފިކުރެއް ކުރިއަރުވަން ކުރާ ކަމެއް ކަމަށް ވަނީ ފާހަގަކޮށްފަ އެވެ. ހަމައެއާއެކު އާންމުންގެ ތެރެއިން ބައެއްގެ ހިތްތަކުގައި ބިރުވެރިކަން އުފެއްދުމަށާއި އެހެން މީހެއްގެ ފުރާނައަށް ނުރައްކާވާ ފަދަ އެ އަމަލު، ކުށްވެރިކުރައްވާކަމަށް އެ މައްސަލާގައިވެ އެވެ.

އެ މައްސަލަ ބަލައިގަތުމަށް ނެގި ވޯޓުގައި 44 މެންބަރުން ވޯޓު ދެއްވީ މައްސަލަ ބަލައިގަތުމަށެވެ. ނަމަވެސް އަށް މެންބަރަކު ދެކޮޅަށް ވޯޓު ދެއްވިއިރު، އެއް މެންބަރަކު ވަނީ ވަކި ގޮތަކަށް ވޯޓު ދެއްވުމާ ދެކޮޅަށް ވޯޓު ދެއްވާފަ އެވެ.

އެއާއެކު އެ މައްސަލަ ސަރުކާރުގެ ސަމާލުކަމަށް ގެނެސް، ކަމާ ގުޅުން ހުރި އިދާރާތަކުން ތަހުގީގުކުރުމަށް މެންބަރު މުފީދު ވަނީ ގޮވައިލައްވައިފަ އެވެ.

ޓެރަރިޒަމް މަނާކުރުމުގެ ގާނޫނުގައި ސީދާ ގޮތުން އަދި ނުސީދާ ގޮތުން ވިޔަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށް ބަޔާންކޮށްފައިވާކަން ފާހަގަކުރައްވާ މުފީދު ވިދާޅުވީ އެމްޑީޕީން ޕޯޑިއަމްތަކުގައި ދައްކާފައިވާ ވާހަކަތަަކަކީ ވަކި ސިޔާސީ ފިކުރެއް ކުރިއެރުވުމަށާއި އާންމުންގެ މެދުގައި ބިރުވެރިކަން އުފެއްދުމާއި އެެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަގުސަދުގައި ޓެރަރިޒަމްގެ އަމަލެއް ކުރުމަށް ހިތްވަރު ދިނުމަށް ދައްކާފައިވާ ވާހަކަތަކެއް ކަމަށެވެ.

"ވަރަށް ސާފުކޮށް އެނގޭ ކަމެއް. އެމްޑީޕީން ޕޯޑިއަމްތަކުގަ ދައްކާފައިވާ އެ ވާހަކަތަަކަކީ ވަކި ސިޔާސީ ފިކުރެއް ކުރިއެރުވުމަށާއި އާންމުންގެ މެދުގައި ބިރުވެރިކަން އުފެއްދުމާއި އެެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަގުސަދުގައި ޓެރަރިޒަމްގެ އަމަލެއް ކުރުމަށް ހިތްވަރު ދިނުމަށް ދައްކާފައިވާ ވާހަކަތަކެއް،" މެމްބަރު މުފީދު ވިދާޅުވި އެވެ.

ފައްޔާޒު ދެއްކެވި މި ވާހަކަތަކަށް ސަރުކާރަށް ތާއިދުކުރާ ފަރާތްތަކުންނާއި ސަރުކާރުގެ މިނިސްޓަރުން ވަނީ އެކަން ކުށްވެރިކޮށްފަ އެވެ. އަދި ރައްޔިތުންގެ މަޖިލީހުގެ ރައީސް، އަބްދުއްރަހީމް ވަނީ އެ މައްސަލަ ބެލުމަށް ކަމާ ބެހޭ މުއައްސަސާތަކަށް ގޮވާލައްވާފަ އެވެ.

ރައީސަށް އިންޒާރުދޭ މޭރުމަކުން މީހަކު ވާހަކަ ދައްކާފައިވަނީ "ގާނޫނު އަސާސީގެ ދިފާއުގައި" ގެ ނަމުގައި ކުޅުދުއްފުށި ސިޓީގައި މިދިޔަ ހުކުރު ދުވަހުގެ ރޭ އެމްޑީޕީން ބޭއްވި ޖަލްސާއެއްގަ އެވެ. އެ މައްސަލަ ފުލުހުން ބަލަމުންދާ ކަަމަށް މިދިޔަ ހޮނިހިރު ދުވަހު ބުނެފައިވެ އެވެ.