ހައްގަކީ ތަބަކަށް ލާފައި ދޭނެ އެއްޗެއް ނޫން ކަމަށާއި ހައްގަކީ ބުރަ މަސައްކަތް ކޮށްގެން ހޯދަން ޖެހޭއެއްޗެއް ކަމަށް ކުރީގެ ރައީސް އިބުރާހީމް މުހައްމަދު ސޯލިހު ވިދާޅުވެއްޖެ އެވެ.

ގާނޫނު އަސާސީގެ ދިފާއުގައި އެމްޑީޕީން މިހާރު ކާނިވާ ސަރަހައްދުގައި ކުރިއަށް ގެންދާ ޖަލްސާގައި ވާހަކަ ދައްކަވަމުން ސޯލިހު ވިދާޅުވީ މި ސަރުކާރުން ގެންދަނީ ރައްޔިތުންގެ ހައްގުތައް ނިގުޅައިގަންނަމުން ކަމަށާއި އެހެންކަމުން އެ ހައްގުތަކުގެ ދިފާއުގައި ހައްގުތައް ކަށަވަރުކުރުމަށް އެންމެ އެކުގައި ނުކުންނަން ޖެހޭކަމަށެވެ.

"މި ސަރުކާރުން ގެންދަނީ ރައްޔިތުންގެ ހައްގުތައް ނިގުޅައިގަންނަމުން. އެ ހައްގުތައް ހޯދަން އެބަ ނުކުންނަން ޖެހޭ. ހައްގަކީ ތަބަކަށްލާފައި ދޭނެ އެއްޗެއް ނޫން. އެއީ ބުރަމަސައްކަތުން ހޯދަން ޖެހޭ އެއްޗެއް،" ސޯލިހު ވިދާޅުވި އެވެ.

އެމަނިކުފާނު ވިދާޅުވީ މި ސަރުކާރުން މަސްވެރިކަމުގެ ސިނާއަތް މުޅިން ފުނޑާލައިފިކަމަށާއި އެންމެންގެ ބޭންކަށް އަތް ބާނާ ބޭންކު ހިސޯރުކޮށްފިކަމަށެވެ. އެގޮތުން މިހާރު ބޭންކުގެ ސޭވިންގް އެކައުންޓުތަކާ މެދު އެއްވެސް ކަށަވަރުކަމެއް ނެތްކަމަށް އެމަނިކުފާނު ވިދާޅުވި އެވެ. އަދި މި ގައުމުގައި ޒުވާނުންނަށް އޮތް ފަހި ފުރުސަަތުތައް ނަގާލައި ޒުވާނުން ބިކަކޮށްފި ކަމަށާއި މަޖިލިސް ތަޅުއަޅުވާ، މެމްބަރުން ހިސޯރުކޮށްފައިވާ ކަމަށް ސޯލިހު ވިދާޅުވި އެވެ.

އެމަނިކުފާނު ވިދާޅުވީ ކުރިއަށްއޮތީ ނާމާން ދުވަސްތަކެއް ކަމަށާއި އަނިޔާވެރިކަމާ ދެކޮޅަށް މިއަދުން މިއަދަށް ފިޔަވަޅު އަޅަންޖެހޭ ކަމަށެވެ.

"އަޅުގަނޑުމެންނަށް ކުރިމަތިން މި ފެންނަމުންދާ ވިލާގަނޑުން އަޅުގަނޑުމެންނަށް ފެންނަނީ ވަރަށް ބަނަ ދުވަސްތަކެއް. ބިރުވެރި ދުވަސްތަކެއް. ނާމާންް ދުވަސްތަކެއް. ދަތި އުނދަގޫ ދުވަސްތަކެއް. އަދި މިކަމާ ދޭތެރޭގައި މިހާރުން މިހާރަށް އަޅުގަނޑުމެން މަސައްކަތްތަކެއް ނުކޮށްފި ނަމަ އަނިޔާވެރި ދުވަސްތަކަކަކާ އަޅުގަނޑުމެންނާ އަނެއްކާ ވެސް ކުރިމަތިލާން ޖެހިދާނެކަން މިއަދުވެސް ފެންނަމުން އެބަދޭ،" ސޯލިހު ވިދާޅުވި އެވެ.