އިދިކޮޅު އެމްޑީޕީގެ މެންބަރުންނަކީ ދީން ގަބޫލުނުކުރާ ބަޔެއް ކަމަށް ވިލިމާލެ ދާއިރާގެ، ވެރިކަން ކުރާ ޕީއެންސީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެންބަރު މުޙައްމަދު އިސްމާއީލް ވިދާޅުވި މައްސަލަ މަޖިލީހުގެ އިމްތިޔާޒާއި ސުލޫކު ކޮމިޓީއާއި ފުލުހުން ބެލުމަށް އެމްޑީޕީން މިއަދު ގޮވާލައިފި އެވެ.

ދައުލަތުގެ މީޑިއާއިން ކީރިތި ގުރުއާނުގެ އާޔަތްތަކަށް ބަދަލު ގެނެސްގެން ދައްކަމުން އަންނަ ކަމަށް ބުނެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ހުށަހެޅި މައްސަލައާ ގުޅޭ ގޮތުން ވާހަކަދައްކަވަމުން މުޙައްމަދު އިސްމާއީލް ވަނީ، އެމްޑީޕީގެ މެންބަރުންނަށް އިޝާރާތް ކުރައްވައި، އެއީ ކީރިތި ގުރުއާނާއި އިސްލާމް ދީން ގަބޫލުނުކުރާ ބައެއް ކަމަށް ވިދާޅުވެފަ އެވެ.

"މި ބޭފުޅުންނަކީ ކީރިތި ގުރުއާން ކީއްކުރަން އިސްލާމް ދީން ގަބޫލުކުރާ ބައެއް ވޭސް ނޫން، މި ރައްޔިތުންގެ މަޖިލީހުގައި އަޅުގަނޑު މި ދަންނަވަނީ. އެމްޑީޕީއަށް ނިސްބަތްވާ ގިނަ މެންބަރުން،" މުޙައްމަދު އިސްމާއީލް ވިދާޅުވި އެވެ.

މިކަމާ ގުޅިގެން އެމްޑީޕީ މެމްބަރު މައުރޫފް ނިޒާމީ ނުކުތާއެއް ނަންގަވައި އެ ވާހަކަ ކުށްވެރިކުރެވުމުން މަޖިލީހުގެ ރައީސް އަބްދުއްރަހީމް އަބްދުﷲ ނިޒާމީ ނުކުތާ ބަލައިގަނެ، އެއްވެސް މެންބަރަކަށް އިޝާރާތް ކުރައްވައި އެއީ އިސްލާމް ދީން ގަބޫލުނުކުރާ މީހެއް ކަމަށް ވިދާޅުނުވުމަށް އެދިވަޑައިގަތެވެ.

މިކަމާ ގުޅިގެން މުޙައްމަދު އިސްމާއީލް ވަނީ މައާފަށް ވެސް އެދިވަޑައިގަންނަވާފަ އެވެ.

އެ ވާހަކައާ ގުޅިގެން އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޓުވީޓެއްގައި ވަނީ އެ ވާހަކަ ކުށްވެރިކުރައްވައިފަ އެވެ.

"މުސްލިމަކު ކަނޑައެޅިގެން ކުފުރުގެ އަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަކުރުމަކީ ޖިނާއީ ކުށެއް ކަމަށް ގާނޫނުލްއުގޫބާތުގެ 124 ވަނަ މާއްދާގައި ބަޔާންކޮށްފައިވޭ،" އަބްދުﷲ ޝާހިދު ވިދާޅުވި އެވެ.

ހަމައެއާއެކު، ދީނީ އެއްބައިވަންތަކަން ނަގައިލުމަށް މަސައްކަތް ކުރުމާއި އެ ބާވަތުގެ ވާހަކަދެއްކުމަކީ މަނާ ކަމެއްކަން ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގައި ބަޔާންކޮށްފައިވާ ކަމަށް ޝާހިދު ވިދާޅުވި އެވެ.

މިއާއެކު ދިވެހިރައްޔިތުންގެ ތެރެއިން ގިނަ އަދަދެއްގެ ބަޔަކު ނިސްބަތްވާ ޕާޓީއެއްގެ މެންބަރުންނަކީ، މުސްލިމުން ނޫންކަމަށް ބުނުމަކީ ރައްޔިތުންގެ ތާއީދު ގެއްލި ސިޔާސީގޮތުން ބަލިވާން ފެށުމުން، އެކަން ފޫބެއްދުމަށް ޓަކައި ރައްޔިތުން ބައިބައި ކުރުމަށް ދީނީގޮތުން ފިތުނަ އުފެއްދުމަށް ފެށި ކަމެއްކަން ޝާހިދު ފާހަގަކުރެއްވި އެވެ.

އެހެންވެ، އެ މައްސަލަ ބަލައި ފިޔަވަޅު އެޅުމަށް މަޖިލީހުގެ ސުލޫކީ ކޮމިޓީއަށް ޝާހިދު ގޮވައިލެއްވި އެވެ.

މީގެ އިތުރުން އެމްޑީޕީން ނެރުނު ބަޔާނެއްގައި ވަނީ އިސްލާމްދީން ފިޔަވައި އެހެން ދީނަކަށް ފުރުސަތު ނުދިނުމަކީ އެ ޕާޓީގެ މަގުސަދެއް ކަމަށް ޕާޓީގެ އަސާސީ ގަވައިދުގައި ބަޔާންކޮށްފައި ވާނެ ކަމަށެވެ. އަދި ގާނޫނުލްއުގޫބާތުގައި ޖިނާއީ ކުށެއް ކަމަށް ބެލެވޭ ކަމެއް ކޮށްފައިވާތީ، އެކަމުގައި ހިމެނޭ ކުށުގެ އަމަލު ތަހުުގީގު ކުރުމަށް އެ ޕާޓީން ގޮވާލި އެވެ.