އިއްޔެ ހިނގި އަލިފާނުގެ ހާދިސާގައި ގެއްލުން ލިބުނު ހައުސިން މިނިސްޓްރީގެ ސާވާ ސަލާމަތް ނުކުރެވި އެ މިނިސްޓްރީން ކުރިއަށްގެންދާ ހުރިހާ މަޝްރޫއުއެއްގެ މައުލޫމާތު ގެއްލިފައިވާ ކަމަށް މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

ޕީއެސްއެމްއަށް މިއަދު ދެއްވި އިންޓަވިއުއެއްގައި މިނިސްޓަރު ހައިދަރު ވިދާޅުވީ އެ މިނިސްޓްރީގެ ހުރިހާ ލިޔެކިޔުމަކާއި ޑޭޓާތައް އަލިފާނުގެ ހާދިސާގައި އެއްކޮށް ނެތިގޮސްފައިވާ ކަމަށެވެ.

"ޚާއްސަކޮށް އަޅުގަނޑުމެންގެ ސާވާ ސަލާމަތް ނުކުރެވޭނެ ކަމަށް މިހާރު އަންދާޒާ ކުރެވެނީ. އެހެންވެއްޖެ ކަމަށްވެއްޖެއްޔާ އެއީ ވަރަށް ބޮޑު ގެއްލުމެއް،" ހައިދަރު ވިދާޅުވި އެވެ.

https://www.facebook.com/watch/?mibextid=wwXIfr&v=1127817682250596&rdid=CaHpz4Gc1X2cWffj

ހައިދަރު ވިދާޅުވީ އާދީއްތަ ދުވަހު ދަރުބާރުގޭގައި އެ މިނިސްޓްރީގެ ޚިދުމަތްތައް ފެށުމަށް ސަރުކާރުގެ ބައެއް ކުންފުންނިތަކުގެ އެހީތެރިކަމާއެކު މަސައްކަތް ކުރަމުން އަންނަ ކަމަށެވެ.

އެ ހާދިސާގައި އަނދާފައިވާ އިންފްރާސްޓްރަކްޗާ މިނިސްޓްރީ އާއި އެންވަޔަރަމެންޓް މިނިސްޓްރީގެ ޚިދުމަތް ވެސް ދަރުބާރުގޭގައި ދިނުމަށް ކުރަންޖެހޭ މަސައްކަތްތައް އަންނަނީ ކުރަމުންނެވެ.

ބައެއް މަޝްރޫއުތަކުގެ މައުލޫމާތާއި އެހެނިހެން މުހިންމު ލިޔެކިޔުންތައް ވުޖޫދުން ނެތިދިޔަޔަސް ބިންވެރިޔާ ސްކީމާއި ގެދޮރުވެރިޔާ ސްކީމްގެ ދަށުން ދޫކުރާ ފްލެޓާއި ގޯއްޗަށް ކުރިމަތިލި މީހުންގެ މައުލޫމާތުތައް ރައްކާކުރެވިފައިވާ ކަމުގެ ޔަގީންކަން މިރޭ ވެސް މިނިސްޓަރު ދެއްވި އެވެ.

ފްލެޓު ލިސްޓާއި ގެދުރުވެރިޔާ ސްކީމާއި ބިންވެރިޔާ ސްކީމުގެ އިތުރުން މިހާރު ހުޅުވާލާފައިވާ ލޯނު ސްކީމުގެ ހުރިހާ މައުލޫމާތެއް ރައްކާކޮށްފައި ވަނީ ކްލައުޑް ސާވާއެއްގަ އެވެ. އެހެންވެ އެ ހުރިހާ މައުލޫމާތެއް ރައްކާތެރިކަމާއެކު ހުރިކަމުގެ ޔަގީންކަން ހައިދަރު ދެއްވި އެވެ.