ކާމިޔާބު ގިނަ ފިލްމުތަކަކުން ފެނިފައިވާ ބޮލީވުޑްގެ ތަރި އަބޭ ޑިއޯލްއާ އެންމެ ވައްތަރު މީހެއް ހޯދުމަން އިންޑިއާގެ ވެރިރަށް ދިއްލީގައި މުބާރާތެއް ބާއްވައިފި އެވެ.

"ސިނަފައިލްސް ފިލްމްސް" އިންސްޓަގްރާމް އެކައުންޓުން އިންތިޒާމު ކޮށްގެން މިދިޔަ އާދީއްތަ ދުވަހު ބޭއްވި އެ މުބާރާތުގައި ބައިވެރިވާން އެތައް ސަތޭކަ ބަޔަކު ދިއްލީގެ ހަސް ޕާކަށް އެއްވި އެވެ.

އެގޮތުން އެއްބަޔަކު އަބޭގެ އިންސްޓަގްރާމްގައި ހިއްސާކޮށްފައިވާ ފޮޓޯތަކާ އެއްގޮތް ހެދުން އަޅައިގެން އައިއިރު އަނެއްބަޔަކު ހިޔާރުކުރީ އަބޭގެ ފިލްމު ކެރެކްޓަރުންގެ ރޯލުތަކެވެ.

ކޮންމެއަކަސް މުބާރާތުގެ ފަނޑިޔާރުންގެ ނިންމުމުން އެއްވަނައަށް ދިޔަ ފަރާތަށް ލިބުނީ 500 ރުޕީސްގެ މާލީ އިނާމެއްގެ އިތުރުން ދެ ޕަކެޓު ޗުއިންގަމެވެ.

މި މުބާރާތް ބާއްވާފައި މިވަނީ ހަމަ މިފަދަ ސިފަ ވައްތަރު މީހުން ހޯދުމުގެ މުބާރާތްތައް ބޭއްވުމުގެ "ޓްރެންޑެއް" ހޮލީވުޑުގައި ވެސް ކުރިއަށްދާ ދަނޑިވަޅެއްގަ އެވެ.

އެގޮތުން ޓިމޮތީ ޗަލަމެޓް، ހެރީ ސްޓައިލްސް، ޒެންޑާޔާ އަދި ޒޭން މަލިކްއާ ވައްތަރު މީހުން ހޯދުމުގެ މުބާރާތްތަކެއް ވަނީ ބާއްވާފަ އެވެ.