އިންޑިއާގައި މިއުޒިކް ކޮންސެޓެއް ބާއްވަން އެކަށީގެންވާ އުމްރާނީ ބަދަލުތައް ނުގެނެވެނީސް އަމިއްލަ ގައުމުގައި ދެން ކޮންސެޓެއް ނުބާއްވާނެ ކަމަށް އިންޑިއާގެ ލަވަކިޔުންތެރިޔާ ދިލްޖީތު ދޮސަންޖް ބުނެފި އެވެ.

މިމަހުގެ 14 ވަނަ ދުވަހު ޗަންދީގަރްގައި ބޭއްވި ކޮންސެޓް ނިންމާލަމުން ދިލްޖީތު ބުނީ އިންޑިއާގައި ލައިވް ޝޯތައް ބާއްވަން އެކަށީގެންވާ ވަސީލަތްތައް ނެތް ކަމަށާއި އެ ވަސީލަތްތައް ގާއިމު ކުރެވެންދެން އިތުރު ކޮންސެޓެއް އެގައުމުގައި ނޯންނާނެ ކަމަށެވެ.

"މިއީ އާމްދަނީ ހޯދަން ލިބޭ ފުރުސަތެއް. ގިނަ ބަޔަކު މިތާ މަސައްކަތްކުރޭ. އަހަރެން މަސައްކަތް ކުރާނަން ދެން ބާއްވާ ޝޯގައި ސްޓޭޖުގެ ވަށައިގެން މީހުންނަށް ތިބެވޭ ގޮތަށް ބަހައްޓަން. އެކަން ފަހި ނުވާހާ ހިނދަކު އިންޑިއާގައި ކޮންސެޓެއް ނޯންނާނެ،" ދިލްޖީތު ބުންޏެވެ.

ޗަންދީގަރުގައި ބޭއްވި ކޮންސެޓަށް ވެސް އެތައް ހާސް ބަޔަކު އެއްވެފައިވާއިރު ގިނަ ބަޔަކަށް ޝޯ ރަނގަޅަށް ނުފެނިގެން ޝަކުވާތައް ވެސް ލިބިފައިވެ އެވެ.

އެ ކޮންސެޓުގެ ތެރެއިން ދިލްޖީތު ވަނީ ދުނިޔޭގެ އެންމެ ހަގު ރާޒުވާ ޗެމްޕިއަންކަން ހޯދި އިންޑިއާގެ ގުކޭޝް ދޮމަރަޖޫއަށް މަރުހަބާ ކިޔާފަ އެވެ.

އެ ޝޯގެ ތެރެއިން ފާހަގަވި އަނެއް ކަމަކީ ޗަންދީގަރް ކޮމިޝަން އޮފް ޕްރޮޓެކްޓިން ޗައިލްޑް ރައިޓްސްގެ ލަފައާއެކު ރާބުއިމާ ގުޅުންހުރި ވާހަކަތައް އެކުލެވޭ ލަވަތައް ޝޯގައި ހިމަނާފައި ނުވާ ކަމެވެ.