އެންޓި ކޮރަޕްޝަން ކޮމިޝަން (އޭސީސީ)އިން ހުސްވެފައިވާ މެންބަރު ކަމުގެ ދެ މަގާމަކަށް ކުރިމަތިލާން އަލުން ހުޅުވާލައިފިއެވެ.

ރައީސް އޮފީހުން އޭސީސީގެ މެމްބަރުކަމަށް ކުރިމަތިލުމަށް ފުރަތަމަ ހުޅުވައިލީ މިދިޔަ ހަފުތާގެ އާދިއްތަ ދުވަހުއެވެ. ނަމަވެސް، މިއަދު ވަނީ އެ އިއުލާނު ބާތިލުކޮށް އަލުން އެ މަގާމުތަކަށް ހުޅުވާލާފައެވެ.

އޭސީސީގެ މެންބަރުކަމަށް އެދި ހުށަހެޅުމުގެ ފުރުޞަތު ހުޅުވައިލާފައި ވަނީ މިއަދުން ފެށިގެން މި މަހުގެ 31ވާ ހޯމަ ދުވަހުގެ 12:00ގެ ނިޔަލަށެވެ.

ރައީސް އޮފީހުން ބުނީ، އޭސީސީގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، އެކަމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން 12:00 އަށް ރައީސް އޮފީހުން ކަމަށެވެ.

‎ރައީސް އޮފީހުން ބުނީ އޭސީސީގެ މެންބަރުކަމުގެ މަޤާމަށް ކުރިމަތިލުމަށް އެދޭ ފޯމު ރައީސް އޮފީހުގެ ރިސެޕްޝަނުން ލިބެންހުންނާނެ ކަމަށާއި އޮފީހުގެ ވެބްސައިޓުން ފޯމު ޑައުންލޯޑް ކުރެއްވޭނެ ކަމަށެވެ.

އޭސީސީގެ މެމްބަރުކަމަށް ކުރިމަތިލާން ހުޅުވާލާފައި ވަނީ އޭސީސީގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު އިސްތިއުފާ ދެއްވުމާ ގުޅިގެންނެވެ.