އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދަށް ބިންވެރިޔާ ސްކީމްގެ ދަށުން ގޯތި ލިބިފައިނުވާއިރު، ގޯތި ހަވާލުކުރަން އޭނާ އެޗްޑީސީގައި އެދުމަކީ އިއްތިފާގެއް ކަމަށް ފަޒުލް ވިދާޅުވެއްޖެ އެވެ.

ހަސަންކުރުސީގެ ނަމުގައި ހިންގާ އެކްސް އެކައުންޓުން މިއަދު ފަޅާއަރުވާލި ގޯތީގެ ޖަރީމާއާ ގުޅިގެން މިރޭ ކުއްލިގޮތަކަށް ބޭއްވި ނޫސްވެރިންގެ ބައްދަލުވުމުގައި އަމާޒުވި ސުވާލަކަށް ޖަވާބުދެއްވަމުން ފަޒުލް ވިދާޅުވީ ބިންތައް ހަވާލުކުރުމުގެ އެއްބަސްވުންތަކާއި ރަޖިސްޓްރީތައް ހަދައި ދިނުމަކީ ހައުސިން މިނިސްޓްރީން ކުރާ ކަމެއް ކަމަށެވެ. އެކަމުގައި އެޗްޑީސީގެ ދައުރެއް ނޯންނާނެ ކަމަށް އޭނާ ވިދާޅުވި އެވެ.

ބިންވެރިޔާ ސްކީމްގެ ދަށުން ގޯތި ލިބުނު މީހުންގެ ފައިނަލް ލިސްޓްގައިވާ ގޮތުން ފަޒުލްގެ ބޭބެ ފަޒީލް ގޯއްޗަށް ޝަރުތު ހަމައެއް ނުވެ އެވެ.

އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރުކަން ކުރައްވާ ފަޒީލްއަށް ގޯތި ލިބިފައިވާކަމުގެ ސައްހަ ނޫން އެގްރީމެންޓެއް ހައުސިން މިނިސްޓްރީގެ ނަމުގައި ތައްޔާރުކޮށް، ގޯތި ހަވާލުކުރަން އެޗްޑީސީގައި ވަނީ އެދިފަ އެވެ. އެކަމާ ގުޅިގެން އެޗްޑީސީން ހައުސިން މިނިސްޓްރީއަށް ފޮނުވި ސިޓީގެ ޖަވާބުގައި ވަނީ ފަޒީލްއަކީ ގޯތި ލިބިފައިވާ މީހެއް ނޫން ކަމަށެވެ.

އެކަން ހިނގިތާ ފަސް މަސްވެފައިވާއިރު، އެޗްޑީސީން އެ މައްސަލަ ފުލުހުންނަށް ހުށަހަޅާފައެއް ނުވެ އެވެ. އެކަމާ ގުޅިގެން ނޫސްވެރިއަކު ސުވާލުކުރުމުން ފަޒުލް ވިދާޅުވީ އެ ކުންފުނިން ބެލީ މައްސަލަ ފުލުހުންނަށް ހުށަނާޅައި އެކަން ހައްލުކުރަން ކަމަށެވެ. އެ މައްސަލަ ހައުސިން މިނިސްޓްރީން ވެސް ފުލުހުންނަށް ހުށަހެޅި ކަމެއް ހާމަކޮށްފައެއް ނުވެ އެވެ.

ނޫސްވެރިއަކު ކުރި ސުވާލެއްގެ ޖަވާބުގައި ފަޒުލް ވިދާޅުވީ އެ މައްސަލައިގެ ތެރޭގައި އޭނާގެ ބޭބެ ހިމެނުމަކީ އިއްތިފާގެއް ކަމަށެވެ. އަދި "އަމިއްލަ ލޭ ހިނގިޔަސް" ކަން ކުރާނީ އޮންނަ އުސޫލުގެ ތެރެއިން ކަމަށް ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ހިންގި ގޯތީގެ ޖަރީމާއާ ގުޅިގެން ގޯއްޗާއި ފްލެޓް ލިބުނު ގިނަ ބަޔަކު މިރޭ ވަނީ އެޗްޑީސީގެ އިމާރާތް ކައިރިއަށް އެއްވެ މުޒާހަރާކޮށްފަ އެވެ. މުޒާހަރާގެ ބައިވެރިން ގޮވާލީ ފަޒުލް ހައްޔަރުކޮށް އެ މައްސަލައިގެ އިންސާފުވެރި ތަހުގީގެއް ހިންގުމަށެވެ.

ނޫސްވެރިންގެ ބައްދަލުވުމުގައި ގިނަ ސުވާލުތަކެއް ކުރުމުން ބައެއް ސުވާލުތަކަށް ޖަވާބު ދެއްވައި، ވަގުތު ނެތް ކަމަށް ވިދާޅުވެ ފަޒުލް ވަނީ އެ ބައްދަލުވުން ނިންމަވާލައްވައި ވަޑައިގެންފަ އެވެ.