ރާއްޖޭގެ ގައުމީ ދިފާއީ ބާރަށް ރައްޔިތުންގެ ހިތްތަކުގައި އޮންނަ އިތުބާރާއި އިހްތިރާމާއި ގަދަރު ނަގާލަން ކުރާ މަސައްކަތަށް ފުރުސަތު ނުދޭނެ ކަމަށް ބުނެ ޑިފެންސް މިނިސްޓްރީން އިންޒާރެއް ދީފި އެވެ.

ޑިފެންސް މިނިސްޓްރީން މިއަދު ނެރުނު ބަޔާނެއްގައި ވަނީ ރާއްޖޭގެ މިނިވަންކަމާ އިސްތިގުލާލު ނަގަހައްޓާ، ރައްޔިތުންގެ ސަލާމަތާ ރައްކާތެރިކަން ކަށަވަރު ކުރުމުގެ މަތިވެރި ޒިންމާ ކޮނޑުގައި އަޅުއްވައިގެން ތިއްބެވި ރާއްޖޭގެ ގައުމީ ދިފާއީ ބާރުގެ އިސް އޮފިސަރުންގެ އަގު ވައްޓާލައި، އެ ބޭފުޅުންނަކީ އެ ބޭފުޅުން ކުރައްވައިގެން ތިއްބެވި މަތިވެރި ހުވަޔާއި ހިލާފުވާނެ ބައެއްގެ ގޮތުގައި ދައްކައި، ޒިންމާދާރު މީޑިއާއަކުން ނުކުރާނެފަދަ ދަށު ދަރަޖައިގެ ހަޑިހުތުރު އަމަލުތައް ބައެއް މަދު މީޑިއާތަކުންނާއި ބައެއް ސިޔާސީ ފަރާތްތަކުން ކުރަމުންގެންދާ ގެންދިއުން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.

ޑިފެންސް މިނިސްޓްރީން މިފަދަ އިންޒާރެއް ދީފައިވާއިރު، ސިފައިންގެ އަގުވެއްޓޭގޮތަށް އިދިކޮޅު ސިޔާސީ އެއްވެސް ބޭފުޅަކު އެއްވެސް އެއްޗެއް ވިދާޅުވެފައެއް ނުވެ އެވެ. އަދި އެއްވެސް މީޑިއާ އަކުން ވެސް ސިފައިންގެ އަގުވެއްޓޭ ގޮތަށް އެއްވެސް ހަބަރެއް ގެނެސްދީފައެއް ވެސް ނުވެ އެވެ.

އުތުރު ތިލަފަޅުގެ އެއްބަސްވުމުގެ ޑްރާފްޓް ކަމަށް ބުނާ ލިޔުމެއް ކުރީގެ ހޯމް މިނިސްޓަރު އުމަރު ނަސީރު ލީކްކޮށްލިފަހުން، އިދިކޮޅު ފަރާތްތަކުން އަންނަނީ އޭގެ އަސްލު އެއްބަސްވުން ހާމަކުރުމަށް ސަރުކާރަށް ގޮވާލަމުންނެވެ.

މީޑިއާތަކުން ވެސް ހަބަރުތައް ގެނެސްދެނީ އެ އެއްބަސްވުމާ ގުޅިގެން ރައްޔިތުންގެ ހުރި ކަންބޮޑުވުންތަކާ ގުޅޭގޮތުންނެވެ.

އެ ލިޔުމުގެ މައްސަލައިގައި މީގެކުރިން ވެސް ޑިފެންސް މިނިސްޓްރީން ވަނީ އަސްކަރިއްޔާގެ އަގު ވައްޓާލަން ކުރާ މަސައްކަތް ހުއްޓުވަން ކުރެވެން ހުރި ހުރިހާ ކަމެއް ކުރާނެ ކަމަށް ބުނެފަ އެވެ.

ނަމަވެސް އަސްކަރިއްޔާގެ އަގުވައްޓާލަން ދެއްކީ ކޮން ވާހަކައެއް ކަމެއް އަދި އެފަދަ ވާހަކައެއް ދެއްކީ ކާކު ކަމެއް ޑިފެންސް މިނިސްޓްރީއަކަށް ބުނެ ނުދެވެ އެވެ.