ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން ހައުސިން މިނިސްޓްރީގެ ނުވަ ސިޔާސީ މުވައްޒަފަކު ސަސްޕެންޑްކޮށްފި އެވެ.

މުވައްޒަފުން ސަސްޕެންޑްކޮށްފައިވަނީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުން ތައްޔާރުކުރި މައްސަލައާ ގުޅިގެންނެވެ. މި މައްސަލަގެ ލިޔުންތައް ސޯޝަލް މީޑިއާގައި ވަނީ ލީކްކޮށްލާފަ އެވެ.

އެ ލިޔުން ތަކުން އެނގޭ ގޮތުން އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދަށް ބިންވެރިޔާ ސްކީމްގެ ދަށުން ގޯތި ލިބިފައިނުވާއިރު، ގޯތި ހަވާލުކުރަން އޭނާ އެޗްޑީސީގައި އެދިފައިވެ އެވެ. އަދި އެޗްޑީސީގެ ހުއްދައާ އެކު އޭނާ ވަނީ "ވަގު ގޯތީގައި" ވަށާފާރު ރާނާފަ އެވެ.

ގޯތިތަކާ ގުޅިގެން ހައުސިން މިނިސްޓްރީ އާއި އެޗްޑީސީ އާ ދެމެދު ސިޓީތަކެއް ބަދަލުކޮށްފައިވާއިރު، ތަހުގީގަށް ބޭނުންވާ ލިޔެކިޔުންތައް ހައުސިން މިނިސްޓްރީން މިހާތަނަށް ލިބިފައިވާ ކަމަށް ފުލުހުން ވަނީ ބުނެފަ އެވެ.

އެނގިފައިވާ ގޮތުން ހައުސިން މިނިސްޓްރީގެ 9 މުވައްޒަފުން ސަސްޕެންޑްކޮށްފައި ވަނީ އިއްޔެގެ ރަސްމީ ގަޑި ނިމުނުފަހުންނެވެ. އެ މުވައްޒަފުން ސަސްޕެންޑްކުރި ސަބަބު މިނިސްޓްރީން ހާމަކޮށްފައިނުވެ އެވެ.

ވަގު ގޯތި މައްސަލައާ ގުޅިގެން ޖިނާއީ ތަހުގީގެއް ހިންގަން ޕީޖީ އައްބާސް ޝަރީފް އަމުރުކުރައްވާފައިވާއިރު، ފުލުހުންނާއި އޭސީސީންވެސް ދަނީ މި މަސައްލަ ތަހުގީގު ކުރަމުންނެވެ.

މައްސަލައާ ގުޅިގެން ފަޒުލް އާއި ފަޒީލް ހިމެނޭ ގޮތަށް 20 މީހުންގެ ޕާސްޕޯޓް ވަނީ ހިފަހައްޓާފަ އެވެ.

މި މައްސަލައާއި ގުޅިގެން ފަޒުލް އާއި އޭނާގެ ބޭބެވެސް ވަނީ މަގާމުން ސަސްޕެންޑްކޮށްފަ އެވެ. މީގެ އިތުރުން އެޗްޑީސީ ބޯޑުގެ ޗެއާމަން ފިޔަވާ ހުރިހާ މެންބަރުންވެސް ވަނީ ސަސްޕެންޑްކޮށްފަ އެވެ. އެޗްޑީސީ ބޯޑުގައި ގިނައިން ތިބީ މި ސަރުކާރުގެ ޑެޕިއުޓީ މިނިސްޓަރުންކަން ފާހަގަކޮށްލެވެ އެވެ.