ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު ހަސަން މުފީދު އަބްދުލްގާދިރާއި އޭނާގެ އަނބިކަނބަލުން ހައްވާ ސައީދާއަށް ވެސް ނުހަައްގުން ވިނަރެސް ފްލެޓް ލިބިފައިވާކަން ހާމަވެއްޖެ އެވެ.

ހަސަން ކުރުސީގެ ނަމުގައި ހިންގާ އެކްސް އެކައުންޓުން ވަނީ މެމްބަރު މުފީދާއި އޭނާގެ އަނބިކަނބަލުން ހައްވާ ސައީދާގެ ނަން ހިމެނޭ ފްލެޓް ދިން މީހުންގެ ލިސްޓް ލީކްކޮށްލާފަ އެވެ.

އެ ދެ ބޭފުޅުންނަށް ފްލެޓް ދީފައި ވަނީ ސީލައިފްގެ މައްސަލައާ ގުޅިގެން ފްލެޓް ދޭންޖެހޭ މީހުން ކަމަށް ބުނެ އެވެ. އެކަމަކު ސިވިލް ކޯޓުން ސީލައިފް މައްސަލާގައި ކުރި ހުކުމްގައި އެ ދެ މީހުންގެ ނަމެއް ނެތެވެ. ފްލެޓް ވިއްކަންޖެހެނީ އެ ހުކުމްގައި ތިބި މީހުންނަށެވެ.

ސިވިލް ކޯޓްގެ ހުކުމްގައިވާގޮތުން ސީލައިފް މައްސަލައާ ގުޅިގެން ފްލެޓް ވިއްކަންޖެހެނީ 206 މީހަކަށެވެ. އެކަމަކު ސީލައިފްގެ މައްސަލާގައި ކަމަށް ބުނެ 226 މީހަކަށް ފްލެޓް ވިއްކާފައިވެ އެވެ. އެހެންކަމުން ސީލައިފްގެ މައްސަލައާ ގުޅިގެން ކަމަށް ބުނެ ނުހައްގުން ޖުމްލަ 20 މީހަކަށް ފްލެޓް ވިއްކާފައިވެ އެވެ.

ފުލުހުންނާއި އޭސީސީން ތަހުގީގު ކުރަމުން އަންނަނީ ބިންވެރިޔާ ސްކީމްގައި ނުހިމެނޭ ބަޔަކަށް އެޗްޑީސީން ވަގަށް ގޯތި ދިން މައްސަލަ އެވެ. ވިނަރެސް ފްލެޓްތަކުން ހިންގި ޖަރީމާތަކުގެ މައްސަލަ ނުބަލަ އެވެ.

އެޗްޑީސީގެ ކޮރަޕްޝަންގެ މައްސަލަތައް ހާމަވުމުން ރައީސް ޑރ. މުހައްމަދު މުއިއްޒު އެކި ގްރޫޕްތަކަށް ފޮނުވި މެސެޖްގައި ވިދާޅުވެފައި ވަނީ ކޮރަޕްޝަންގެ އަމަލުތައް ހިންގާ މީހުންނާ މެދު ފަސްޖެހުމެއް ނެތި ފިޔަވަޅު އަޅުއްވާނެ ކަމަށެވެ. ނަމަވެސް މުފީދަކީ މަޖިލިސް މެމްބަރެއް ކަމަށްވާއިރު، އޭނައާ މެދު ފިޔަވަޅު އަޅަން ރައީސް މުއިއްޒަށް ކެރިވަޑައިގަންނަވާނެތޯ ސުވާލު އުފެދެ އެވެ.