ދާދި ފަހުން ބޭއްވި އިވެންޓެއްގެ ތެރެއިން ބޮލީވުޑްގެ މަޝްހޫރު އެކްޓަރު ޝާހްރުކް ޚާންގެ ފޯނު ސްކްރީންއަށް މީޑިއާއާއި އާއްމުންގެ ސަމާލުކަން ހުއްޓިއްޖެ އެވެ.

މީގެ ދެ ދުވަހެއް ކުރިން ޝާހްރުކް ޚާންއާއި އޭނާގެ އާއިލާ އޭނާގެ ހަގު ދަރިފުޅު އަބްރާމްގެ ސްކޫލުގައި އޮތް އިވެންޓަކަށް ދިޔައިރު ގިނަ ބައެއްގެ ލޮލުގައި އަޅައިގަތީ ޝާހްރުކް ޚާންގެ ފޯނުގެ ލޮކް ސްކްރީން ވޯލް ޕޭޕާ އެވެ. އެ އިވެންޓުގެ ތެރެއިން ނަގާފައިވާ ބައެއް ފޮޓޯތަކުން ޝާހުރުކް ޚާންގެ ފޯނު ފެންނައިރު އެ ފޮޓޯތައް އިތުރަށް ޒޫމް ކޮށްލުމުން ފޯނުގެ ލޮކް ސްކްރީނަށް ލާފައިވަނީ އަބްރާމްގެ ފޮޓޯއެއްކަން އެނގެ އެވެ.

އެކަން ފާހަގަ ކުރަމުން އާއްމުންގެ މީހަކު ސޯޝަލް މީޑިއާއަށް ހިއްސާކުރި ޕޯސްޓެއްގައި ޝާހްރުކް ޚާންގެ ފޯނުގެ ފޮޓޯއަކާއި އެ ފޯނުގެ ސްކްރީންގައި ބޭނުންކޮށްފައިވާ ފޮޓޯގެ އަސްލު ވަނީ ހިއްސާކޮށްފަ އެވެ.

އެ ފޮޓޯގައި ފެންނަނީ އަބްރާމް ކެމެރާއާ ދިމާއަށް ބަލަހައްޓައިގެން ހުންނަ މަންޒަރެވެ. ބެލެވޭ ގޮތުގައި އެއީ ޝާހްރުކް ޚާން އަމިއްލައަށް ނަގާފައިވާ ފޮޓޯ އެކެވެ.

ފިލްމީ މަސައްކަތްތަކަށް ބަލާއިރު ޝާހްރުކް ޚާންގެ ކުރިއަށް އޮތް ފިލްމަކީ ސުބާޝް ގޯޝްގެ "ކިންގް" އެވެ. އެ ފިލްމުގައި އޭނާގެ އަންހެން ދަރިފުޅު ސުހާނާގެ އިތުރުން އަބީޝޭކް ބައްޗަން ފެނިގެންދާނެ އެވެ.