ޕީޕީއެމް އިން މާލޭގައި ބޭއްވި މުޒާހަރާ އަކާ ގުޅިގެން އެ ޕާޓީ 75،000 ރުފިޔާ އިން ޖޫރިމަނާ ކޮށްފި އެވެ.

އިލެކްޝަންސް ކޮމިޝަނުން ބުނީ ޕީޕީއެމް ޖޫރިމަނާ ކުރީ މިދިޔަ ފެބްރުއަރީ މަހުގެ 12 ވަނަ ދުވަހު "ކޮބާ މަގޭ ފްލެޓް" ގެ ނަމުގައި ޕީޕީއެމްއިން މާލޭގައި ކުރިއަށް ގެންދިޔަ މުޒާހަރާއާ ގުޅިގެން ކަމަށެވެ.

އެ މުޒާހަރާއާ ގުޅިގެން ޖަވާބުދާރީވާން ފެބުރުއަރީ 22 ވަނަ ދުވަހު އެ ޕާޓީއަށް އެންގި އެވެ. ނަމަވެސް ދީފައި ވަނީ ކަމާ ނުގުޅޭ ޖަވާބެއް ކަމަށް އިލެކްޝަންސް ކޮމިޝަނުން ބުންޏެވެ.

ޕީޕީއެމްގެ އެ މުޒާހަރާއާ ގުޅޭ ރިޕޯޓެއް ފުލުހުންގެ ފަރާތުން ވަނީ އެ ކޮމިޝަނަށް ހުށަހަޅާފަ އެވެ. އެ ރިޕޯޓްގައި އެ މުޒާހަރާގައި ގާނޫނާ ހިލާފު އަމަލުތައް ހިންގި ކަމުގެ ހެކި ހިމަނާފައިވާ ކަމަށް އެ ކޮމިޝަނުގެ ރައީސް އަހްމަދު ޝަރީފް ވިދާޅުވި އެވެ.

މިދިޔަ އޮގަސްޓު މަހުގެ ތެރޭގައި ވެސް ޕީޕީއެމްއާއި ޕީއެންސީ 75،000 ރުފިޔާއިން ޖޫރިމަނާކޮށްފައިވެ އެވެ.