ފަލަސްތީނަށް ބޭނުންވާ އިންސާނީ އެހީ ފޯރުކޮށްދިނުމާ ބެހޭ ގޮތުން އދ. އާއި ބައިނަލްއަގްވާމީ ޖަމިއްޔާތަކާއި އެހެން ގައުމުތަކުން ކުރިއަށްގެންދާ ހަރަކާތްތަކާ ގުޅިގެން އިޒްރޭލުން އުފުލަން ޖެހޭ ޒިންމާތަކާ ބެހޭ ގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގެ ލަފައަކަށް އެދި ހުށަހެޅި ގަރާރަށް ރާއްޖޭން ތާއީދުކޮށްފި އެވެ.

ނޯވޭގެ އިސްނެގުމާއެކު، އިތުރު ބައެއް ގައުމުތަކުގެ ގުރޫޕަކުން ހުށަހެޅި އެ ގަރާރު އދ.ގެ އާންމު މަޖިލީހުން ފާސްކުރީ މިދިޔަ ބުރާސްފަތި ދުވަހު އެވެ.

މިކަމާއި ގުޅިގެން ފޮރިން މިނިސްޓްރީން މިއަދު ނެރުނު ނޫސްބަޔާނެއްގައި ބުނީ ރާއްޖެ ހިމެނޭހެން 137 ގައުމުގެ ތާއީދާ އެކު ފާސްކުރި އެ ގަރާރު ރާއްޖޭން ވަނީ ކޯސްޕޮންސާކޮށްފައި ކަމަށެވެ.

ރާއްޖޭން ގަބޫލުކުރާ ގޮތުގައި މިއީ އދ. އާއި ބައިނަލްއަގްވާމީ ޖަމިއްޔާތަކާއި އެހެން ގައުމުތަކުން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތައް ދަމަހައްޓަން އެޅޭ މުހިންމު ފިޔަވަޅެކެވެ.

އެ ގަރާރަށް ލިބިފައިވާ ތާއީދަކީ 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް ފަލަސްތީނުގެ މިނިވަން އަދި ސިޔާދަތީ ދައުލަތެއް ގާއިމުކުރުމަށް ކުރެވެމުންދާ މަސައްކަތަށް ލިބިގެންދާ ބާރެއް ކަމަށް ރާއްޖޭން ދެކޭކަމަށްވެސް ބަޔާނުގައި ބުނެފައިވެ އެވެ.

އޮކްޓޫބަރު 2023 އިން ފެށިގެން އިޒްރޭލުން ފަލަސްތީނަށް ދެމުންދާ ހަމަލާތަކުގައި ޝަހީދުވި މުސްލިމުންގެ އަދަދު 43،469 އަށް އަރައިފައިވާއިރު، އޭގެ ތެރޭގައި 17،000 އަށްވުރެ ގިނަ ކުޑަކުދިންނާއި 11000 އަށް ވުރެ ގިނަ އަންހެނުން ހިމެނޭކަމަށެވެ.

މީގެ އިތުރުން އިޒްރޭލުން ދަނީ ޣައްޒާއަށް އިންސާނީ އެހީ ފޯރުކޮށްދޭ ހުރިހާ މަގެއް ބަންދުކޮށް އެކަމަށް ހުރަސްއަޅަމުންނެވެ.