ބެން އެފްލެކްއާއެކު ކައިވެނި ކޮށްގެން އުޅުނުއިރު ދިރިއުޅުނު ގެ ވިއްކާ ނުލެވިގެން ޖެނިފާ ލޮޕޭޒް ހުރީ ހާސްވެ ކަންބޮޑުވެފައި ކަމަށް ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި 68 މިލިއަން ޑޮލަރުގެ އެ ގެއަށް އެކި ފަހަރުމަތިން ބަދަލުތައް ގެނެސް ބާޒާރުގައި ވިއްކަން އިއުލާން ކޮށްފައިވީ ނަމަވެސް މިހާތަނާ ޖެހެންދެން ވެސް އެ ގެ ގަންނާނެ ފަރާތެއް ނުވެ އެވެ.

އެ ގެ ވިއްކާލަން ޖެނިފާ އެހާ ބޭނުންވަނީ އެއީ އޭނާއާއި ބެން ކައިވެނި ކޮށްގެން އުޅުނު ގެއަށް ވެފައި ބެންގެ ހަނދާންތައް އެ ގެއާ ގުޅިފައި ވުމުން ކަމަށް ބުނެވެ އެވެ.

"އެ ގެ ވިއްކާލަން ޖެނިފާ ހުރީ ކެތްމަދުވެފައި. ގެއަށް ގެނެވުނު ބަދަލުތަކާއެކު އޭނާ ހީކުރީ ގަންނާނެ މީހަކު ވާނެ ކަމަށް. އެކަމަކު އަދި ނަސީބެއް ނެތް،" ޖޭލޯއާ ގާތް ފަރާތަކުން ބުނެފައިވެ އެވެ.

އެ ފަރާތުން އިތުރަށް ބުނީ އެ ގޭގެ ސަބަބުން ބެންގެ ހަނދާންތަކުން އަރައިގަންނަން ޖޭލޯއަށް އުނދަގޫތަކެއް ކުރިމަތިވަމުން އަންނަ ކަމަށާއި އެ ގޭގެ ސަބަބުން އޭނާ ހުރީ "ބަނދެވިފައި" ކަމަށެވެ.

ޖުމްލަ 38000 އަކަފޫޓުގެ އެ ގެ ބެންއާއި ޖެނިފާ ގަތީ 2023 ވަނަ އަހަރު އެވެ. އެހެން ނަމަވެސް އެމީހުންގެ ކައިވެނި ރޫޅުމާއެކު ގެ ވިއްކާލަން އިއުލާންކުރީ މިދިޔަ ޖުލައި މަހު އެވެ.