ނިމިދިޔަ 2024 ވަނަ އަހަރަކީ ވަރަށް "އުނދަގޫ" އަހަރެއްގެ ގޮތުގައި ބޮލީވުޑްގެ މަޝްހޫރު ތަރިއެއް ކަމަށްވާ މަލައިކާ އަރޯރާ ސިފަކޮށްފި އެވެ.

އިންސްޓަގްރާމްގައި ހިއްސާކުރި ޕޯސްޓެއްގައި މަލައިކާ ބުނެފައިވަނީ 2024 އަހަރަކީ އުނދަގޫ އަހަރެއް ކަމަށާއި އޭނާއަށް އެތައް ކަމެއް ދަސްވި އަހަރެއް ކަމަށެވެ.

"އަހަރެން 2024 ވަނަ އަހަރަށް ނަފްރަތެއް ނުކުރަން. އެކަމަކު މިއަހަރަކީ އަހަންނަށް އެތައް ކަމެއް ދަސްވި އުނދަގޫ އަހަރެއް،" މަލައިކާގެ ޕޯސްޓުގައި ބުނެފައިވެ އެވެ.

މަލައިކާ އިތުރަށް ބުނެފައިވަނީ މިދިޔަ އަހަރު ތެރޭގައި ހިނގާދިޔަ ކަންތައްތައް ހިތަށް ނަގައިގަންނަން ވަގުތު ބޭނުންވާނެ ކަމަށާއި ވަގުތާއެކު އެކަން ވެސް ވާނެ ކަމަށެވެ.

އޭނާ މިހެން ވާހަކަ ދައްކާފައި މިވަނީ 2024 ވަނަ އަހަރު އޭނާއާއި އަރުޖުން ކަޕޫރުގެ ލޯބީގެ ގުޅުން ނިމުމަކަށް އައިސްފައި ވަނިކޮށެވެ.

އޭގެ އިތުރުން ހަމަ އެ އަހަރު ތެރޭގައި މަލައިކާގެ ދޮން ބައްޕަ އަނިލް މެހެތާ ވަނީ އޭނާ ދިރިއުޅުނު އެޕާޓްމަންޓުން ވެއްޓި މަރުވެފަ އެވެ.

މިކަންކަމާއެކު މަލައިކާގެ ޒާތީ ދިރިއުޅުމުގައި 2024 ވަނަ އަހަރަކީ "އުނދަގޫ" އަހަރެއްގެ ގޮތުގައި އޭނާއަށް ސިފަކުރުމުގެ ޖާގަ އެބައޮތެވެ.