ޖުމްލަ 8 އަހަރުގެ ދިގު ކޯޓު މަރުހަލާއަކަށްފަހު އެންމެ ފަހުން ހޮލީވުޑްގެ ދެ ތަރިން ކަމަށްވާ ބްރެޑް ޕިޓްއާއި އެންޖެލީނާ ޖޯލީގެ ކައިވެނި ނިމުމަކަށް އައިސްފި އެވެ.

އެންޖެލީނާގެ ވަކީލުން މީޑިއާއަށް މައުލޫމާތު ދިން ގޮތުގައި އެ ދެމީހުންގެ ވަރީގެ ކަންކަމާއި މުދާ ބެހުމުގެ ކަންކަން ވަނީ މިދިޔަ ބުދަ ދުވަހު ކޯޓުން ނިމިފަ އެވެ.

2014 ވަނަ އަހަރު ކައިވެނިކުރި އެ ދެމީހުންގެ މެދުގައި މައްސަލަޖެހި އެންޖެލީނާ ވަރިއަށް ހުށައަޅާފައިވަނީ 2016 ވަނަ އަހަރުގެ ތެރޭގަ އެވެ. އެކަމަކު 2019 ވަނަ އަހަރު ކޯޓުން އެ ދެމީހުންގެ ވަރި ސާބިތު ކޮށްދިން ނަމަވެސް މުދާ ބެހުމުގެ ކަންކަން ވަކިން ކުރިއަށް ގެންދަން ޖެހޭނެ ކަމަށް ކޯޓުން ބުނެފައިވެ އެވެ.

އެގޮތުން ކުރަންޖެހޭ ހުރިހާ ކަމެއް ނިމި ބްރެޑްއާއި އެންޖެލީނާގެ ގުޅުން އެންމެ ފަހުން މިވަނީ ނިމުމަކަށް އައިސްފައި ކަމަށް އެންޖެލީނާގެ ވަކީލުން ބުނެ އެވެ.

ކައިވެނި ކުރުމުގެ ކުރިން ގާތްގަނޑަކަށް 10 އަހަރު ވަންދެން ރައްޓެހިވެގެން އުޅުނު ބްރެޑްއާއި އެންޖެލީނާ އެކުގައި ހަ ދަރިން ހިއްސާކުރެ އެވެ. އެއީ ތިން އުފަން ދަރިންނާއި ގާނޫނީ ބެލެނިވެރިކަމާ ހަވާލުވި ތިން ކުދިންނެވެ.

ބުނެވޭ ގޮތުގައި ބްރެޑްއާއި އޭނާގެ ކުރީގެ އަންހެނުން ޖެނިފާ އެނިސްޓަންގެ ކައިވެނި ރޫޅުނީ އެންޖެލީނާއާއި ބްރެޑްގެ ލޯބީގެ ގުޅުމުގެ ސަބަބުންނެވެ.