ދުންފަތުގެ ބާވަތެއް އުފެއްދުމަށް ބޭނުން ކުރާ އެއްވެސް އެއްޗެއް އެތެރެ ކުރުމަކީ މަނާކަމެއްކަމަށް ހެލްތު މިނިސްޓްރީން އެކަން މޯލްޑިވްސް ކަސްޓަމްސް ސާވިސްއަށް އަންގައިފި އެވެ.

މިދިޔަ މަހުގެ 24 ވަނަ ދުވަހު ހެލްތު މިނިސްޓްރީން ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާއަށް ފޮނުވި ސިޓީއެއްގައި ބުނެފައި ވަނީ ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ރާއްޖޭގައި އެއްވެސް ބާވަތެއްގެ ދުންފަތެއް އުފެއްދުމަކީ މަނާ ކަމެއްކަމަށެވެ.

އެހެންކަމުން ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އާލާތެއް އެއްވެސް ފަރާތަކުން އެތެރެކޮށްފި ނަމަ އެތަކެތި ހިފަހައްޓައި ނައްތާލުމަށް ހެލުތުން ވަނީ ކަސްޓަމްސްއަށް އަންގާފަ އެވެ.

"ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި 1 ވަނަ އިސްލާހާއެކު އެ ގާނޫނުގެ 42 ވަނަ މާއްދާގެ (ދ)ގައި ބަޔާކޮށްފައިވާ ގޮތުގައި ދުންފަތާއި ދުންފަތުގެ ތަނޑިއާއި، ނިކޮޓިންއާއި، އެތަކެތި ހިމަނައިގެން ތައްޔާރުކޮށްފައި ހުންނަ ތަކެތި އަދި އެއިން އެއްވެސް ބާވަތެއްގެ ތެރެއިން ބާވަތެއް އެއްވެސް މިންވަރަކަށް ހިމެނޭ، ހިފައިގެން ބޮއެގެން ނުވަތަ ވަސްދަމައިގެން ނުވަތަ ހަށިގަނޑުގެ ތަނެއްގައި ތަތްކޮށްގެން ނުވަތަ ޖައްސައިގެން ނުވަތަ އުނގުޅައިގެންވިއަސް އޭގެ މާއްދާއެއް ނުވަތަ މާއްދާތަކެއް ހަށިގަނޑަށް ވާސިލުވާގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާވަތެކެވެ" އެ ސިޓީގައި ބުނެފައިވެ އެވެ.

ހެލްތު މިނިސްޓްރީން މޯލްޑިވްސް ކަސްޓަމްސް ސާވިސްއަށް ފޮނުވާފައިވާ ސިޓީ

ސަރުކާރުން ވަނީ ދުންފަތް ކޮންޓްރޯލް ކުރުމުގެ ގޮތުން ގާނޫނަށް އިސްލާހުގެނެސް ދުންފަތުން ނަގަމުން ދިޔަ ޓެކްސް ބޮޑުކޮށްފަ އެވެ. އެގޮތުން ކުރިން 100ރ އަށް ލިބުނު ސިނގިރޭޓު ފޮށްޓެއް މިހާރު ގަންނަން ލިބެނީ 240ރ އަށެވެ.

މީގެ އިތުރުން ޑިސެމްބަރު 15 އިން ފެށިގެން ވޭޕް ކުރުންވެސް ވަނީ މުޅިން މަނާކޮށްފަ އެވެ. ވޭޕް ބޭނުކޮށް އޭގެ އެއްވެސް ވިޔަފާރީގެ މުއާމަލާތެއް ކޮށްފިނަމަ، ބޮޑެތި އަދަދުތަކުން ޖޫރިމަނާކުރަން ވަނީ ފަށާފަ އެވެ.