މިދިޔަ އަހަރު ވެގެން ގޮސްފައި ވަނީ ބޮލީވުޑްގެ ބައެއް ތަރިންގެ ދިރިއުޅުމަށް ބޮޑެތި ބަދަލުތަކެއް ގެނުވި އަހަރަކަށެވެ. ބައެއް ތަރިން ކައިވެނިކޮށް އާ ދިރިއުޅުމެއް ފެށިއިރު ބައެއް ތަރިންގެ ލޯބީގެ ހަޔާތަށް ވަނީ މަޑުޖެހެމެއް ވެސް އައިސްފަ އެވެ.

އެގޮތުން މި ލިޔުމުގައި މި ބަލާލަނީ ފާއިތުވި 2024 ވަނަ އަހަރު ކައިވެނި ނުވަތަ ލޯބީގެ ގޮތުން ގުޅިގެން އުޅުމަށްފަހު ވަކިވި ބޮލީވުޑުގެ ތަރިންނަށެވެ.

އަރުޖުން – މަލައިކާ

އަރުޖުން ކަޕޫރުއާއި މަލައިކާ އަރޯރާ ވަނީ އަހަރުތަކެއް ވަންދެން ލޯބީގެ ގޮތުން ގުޅިގެން އުޅުމަށްފަހު މިދިޔަ އަހަރު ވަކިވެފަ އެވެ. އެގޮތުން އަރުޖުން ވަނީ އޭނާ ހުރީ ހުސްކޮށް ކަމަށް ފާޅުގައި ބުނެފަ އެވެ.

އަދިތުޔާ – އަނަންޔާ

ބޮލީވުޑްގެ އެންމެ ޒުވާން ތަރިންގެ ތެރޭގައި ހިމެނޭ އަދިތުޔާ ރޯއީ ކަޕޫރުއާއި އަނަންޔާ ޕާންޑޭ އެމީހުންގެ ލޯބީގެ ގުޅުން ނިންމާލީ ވެސް މިދިޔަ އަހަރު ތެރޭގަ އެވެ. އެހެން ނަމަވެސް އެކަން އެއިން އެއްވެސް ތަރިއަކު ޔަގީން ކޮށްދީފައެއް ނުވެ އެވެ.

އޭއާރް ރަހްމާން – ސާއިރާ ބާނޫ

29 އަހަރު ދުވަހު ކައިވެނި ކޮށްގެން އުޅުމަށްފަހު ބޮލީވުޑްގެ މިއުޒިކް ޕްރޮޑިއުސަރު އޭއާރް ރަހްމާންއާއި އޭނާގެ އަންހެނުން ސާއިރާ ބާނޫ ވަރިވިކަން އޭއާރް ވަނީ އޭނާގެ އިންސްޓަގްރާމް މެދުވެރިކޮށް ހާމަކޮށްފަ އެވެ.

ދަނުޝް – އައިޝްވާރްޔާ

ދެކުނު އިންޑިއާގެ އެންމެ މަގުބޫލު ޖޯޑުގެ ގޮތުގައި ގަބޫލު ކުރެވޭ ދަނުޝްއާއި އައިޝްވާރްޔާ ރަޖްނީކާންތުގެ ގުޅުން ނިމުމަކަށް އައީ ދެ ފަރާތުން ވެސް އަނެއް ފަރާތަށް ބޭވަފާތެރިވުމުން ކަމަށް ހަބަރުތައް ބުނެ އެވެ.