ދުނިޔޭގެ އެންމެ ބޮޑު މަހުޖަނު އިލަން މަސްކް، އޭނާގެ އެކްސް އެކައުންޓްގެ ނަން ކުއްލި ގޮތަކަށް ބަދަލުކޮށް ގިނަ ބަޔަކަށް ހައިރާންކަން ގެނުވައިފި އެވެ.

އިލަންގެ އެކްސް އެކައުންޓްގެ ނަން ބަދަލު ކޮށްފައިވަނީ "ކެކިއަސް މެކްސިމަސް" އަށެވެ. މިއީ އިންޓަނެޓުގައި އާއްމުކޮށް ބޭނުން ކުރެވޭ ކެރެކްޓަރެއް ކަމަށްވާ ޕީޕްއަށް ނިސްބަތްވާ ނަމެކެވެ.

މީގެ އިތުރުން ވެސް މިނަމުގެ އެތައް މާނައެއް އެކުލެވޭއިރު އެއީ އޮންލައިން ގޭމްތަކުގައި ބޭނުންކުރެވޭ ބަހުރުވައިގެ ބަހަކަށް ވެސް ނިސްބަތްކުރެވޭ ނަމެކެވެ.

ނަން ބަދަލު ކުރުމާއެކު އިލަން ވަނީ އޭނާގެ ޕްރޮފައިލް ފޮޓޯ ވެސް ބަދަލު ކޮށްފަ އެވެ. މިހާރު އޭނާގެ ފޮޓޯގައި ފެންނަނީ އެ ކެރެކްޓަރު ރޯމަނުންގެ ހަނގުރާމަ މަތީ ހެދުމެއް ލައިގެން ގޭމް ކޮންސޯލްއެއް ހިފައިގެން އިންނަ މަންޒަރެވެ.

އިލަންގެ ސޯޝަލް މީޑިއާއަށް މި ގެނައި ބަދަލުގެ ވަކި ސަބަބައް އޭނާ ހާމަކޮށްފައި ނުވި ނަމަވެސް އެކަން ގުޅިފައިވަނީ އޭނާގެ ސިޔާސީ ފިކުރުތަކާ ކަމަށް ގިނަ ބަޔަކު ބުނެ އެވެ.

އިލަންއަކީ އެމެރިކާގެ އިންތިހާބީ ރައީސް ޑޮނަލްޑް ޓްރަމްޕްގެ ސިޔާސަތުތައް އެންޑޯޒްކޮށް ފާޅުގައި އެ ސިޔާސަތުތަކަށް ތާއީދުކުރާ ފަރާތެކެވެ.