އިންޑިއާ އިން ފަންޑުކޮށްގެން ރައީސް ޑރ. މުހައްމަދު މުއިއްޒުގެ ވެރިކަން ވައްޓާލަން އުޅުނު ކަމަށް ބުނެ އެމެރިކާގެ ވޮޝިންޓަން ޕޯސްޓް ނޫހުގައި ލިޔެފައިވާ ލިޔުމުގައިވާ ވާހަކަތައް ފޮރިން މިނިސްޓަރު ޑރ. އަބްދުﷲ ހަލީލް ދޮގުކުރައްވައިފި އެވެ.

އިންޑިއާގެ ޓީވީ ޗެނަލެއް ކަމަށްވާ "ވިއޯން" އަށް ދެއްވި އިންޓަވިއުއެއްގައި ހަލީލު ވިދާޅުވީ ވޮޝިންޓަން ޕޯސްޓްގައި ވަނީ އެއްވެސް އަސާސެއް ނެތް ވާހަކަތަކެއް ކަމަށެވެ.

"އެއީ މުޅިން ވެސް ހަގީގަތާ ހިލާފު، އެއްވެސް އަސާސެއް ނެތް ވާހަކައެއް. އެ ކަމުގައި އެއްވެސް ހަގީގަތެއް އެކުލެވިގެން ނުވޭ. އެހާ ސިމްޕަލްކޮށް އޮތް ކަމެއް އެއީ،" ހަލީލް ވިދާޅުވި އެވެ.

ރިޔާސީ އިންތިހާބުން ކުރީގެ ރައީސް އިބްރާހިމް މުހައްމަދު ސޯލިހު ބަލިވުމާ ގުޅިގެން ރައީސް މުއިއްޒުގެ ސަރުކާރު ވައްޓާލަން އިންޑިއާގެ ޖާސޫސީ އިދާރާ, ރޯއަށް "ޑިމޮކްރެެޓިކް ރިނުވަލް އިނީޝިއޭޓިވް" ގެ ނަމުގައި އިދިކޮޅު އެމްޑީޕީން ކަރުދާހެއް ހުށަހެޅި ކަމަށް ވޮޝިންޓަން ޕޯސްޓް ނޫހުގައި ރިޕޯޓްކޮށްފައިވެ އެވެ.

އެ ކަރުދާހުގައިވާގޮތުން ވެރިކަން ވައްޓާލަން ބޭނުންވަނީ ހަ މިލިއަން ޑޮލަރު ކަމަށް ވެސް ވޮޝިންޓަން ޕޯސްޓްގައި ލިޔެފައިވެ އެވެ.

ވެރިކަން ވައްޓާލުމުގެ މަޝްވަރާތަކުގައި އިންޑިއާގެ ބަޔަކާއެކީ މެދުވެރިޔެއްގެ ރޯލު އަދާކުރި ކަމުގެ ތުހުމަތު ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ކުރީގެ މެންބަރު ހުސައިން ޝަހީމް (އަނދުން ހުސެއިން) އާއި ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސައަށް ކޮށްފައިވެ އެވެ.

އިންޑިއާ ސަރުކާރުން ވެސް ވަނީ އެ ވާހަކަތައް ދޮގުކޮށްފަ އެވެ.