ފުލުހުންގެ ހައްޔަރުގައި ހުއްޓައި ދަންޖެހިގެން އާދަމް އަތުހަރު މަރުވި މައްސަލަ ތަހުގީގު ކުރުމަށް ފަހު 2 ފުލުހަކަށް ދައުވާކުރުމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ޕްރޮސެކިއުޓަ ޖެނެރަލް (ޕީޖީ) އޮފީހުގައި އެދިއްޖެ އެވެ.

އަތުހަރު ހައްޔަރުކުރީ އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލާގަ އެވެ. އޭނާ ދަން ޖެހުނީ ލައިގެން ހުރި ސޯޓުގެ ނާޑުވާއެއް ބޭނުންކޮށްގެން މިދިޔަ 2 ސެޕްޓެމްބަރުގަ އެވެ.

ހޮސްޕިޓަލުގައި ފަރުވާ ދެމުން ދަނިކޮށް މަރުވީ ވެސް އެ ދުވަހުގަ އެވެ.

އެ މައްސަލައާ ގުޅިގެން އެޗްއާރުސީއެމުން މިއަދު ބުނީ މިހާރު ދެ ފުލުހަކަށް ދައުވާ ކުރުމަށް އެދި ޕީޖީ އޮފީހަށް ފޮނުވާފައިވާނެ ކަމަށެވެ.

ދައުވާ ކުރާ އަސާސްގެ އިތުރު ތަފުސީލެއް ނުދެއްވަ އެވެ.

މާލޭގައި މިދިޔަ އޮގަސްޓް މަހުގެ 29 ވަނަ ދުވަހުގެ ރޭ އަތުހަރު، ވަޅިން ބިރު ދައްކައި އަންހެނަކު ރަހީނުކުރި މައްސަލާގައި އޭނާ ދޫނިދޫގައި ހައްޔަރުކޮށްފައި ހުއްޓާ ޖަލު ގޮޅީގައި އޭނާ ދަންޖެހިފައި ހުއްޓާ ފެނުނީ މިދިޔަ ސެޕްޓެމްބަރު މަހުގެ އެއްވަނަ ދުވަހުގެ ރޭ 7:02 ހާއިރު އެވެ. އޭނާ މާލެ ގެނެސް އައިޖީއެމްއެޗްގެ އެމަޖެންސީއަށް ވެއްދުނީ އެ ރޭ 7:25 ހާއިރު އެވެ.

އައިޖީއެމްއެޗްގައި ފަރުވާ ދެމުން ދަނިކޮށް އަތުހަރު މަރުވީ މިދިޔަ ސެޕްޓެމްބަރު ދެވަނަ ދުވަހުގެ ހަވީރު 4:08 ހާއިރު އެވެ.

އަތުހަރުގެ ހަށިގަނޑު މިދިޔަ ސެޕްޓެމްބަރު މަހުގެ ހަތްވަނަ ދުވަހު އިންޑިއާއަށް ގެންގޮސްގެން ޕޯސްޓްމޯޓަމް ހެދުމުން އޭނާ މަރުވީ ދަންޖެހިގެން ކަމަށް އޮޓޮޕްސީން ރިޕޯޓުން ދައްކާފައިވާ ކަމަށް ފުލުހުން ކުރިން ބުނެފައިވެ އެވެ. އަތުހަރުގެ ހަށިގަނޑު މާލެ ގެނެސް ވަޅުލީ މިދިޔަ ސެޕްޓެމްބަރު އަށްވަނަ ދުވަހު އެވެ.