ރާއްޖޭގައި އިންޑިއާގެ ހެލިކޮޕްޓަރު ބޭއްވުމުގެ މުއްދަތު އިތުރުކުރަން ޑިފެންސް މިނިސްޓަރު މުހައްމަދު ޣައްސާން މައުމޫން އެ ގައުމާއެކު މަޝްވަރާކުރައްވައިފި އެވެ.

އިންޑިއާގެ ނޫސްތަކުގައިވާގޮތުން މިއަދު އިންޑިއާއަށް ވަޑައިގަތުމަށްފަހު ޣައްސާން ވަނީ އެ ގައުމުގެ ޑިފެންސް މިނިސްޓަރު ރަޖުނަތު ސިންހާއާއެކު ބޭއްވި ރަސްމީ ބައްދަލުވުމެއްގައި، ރާއްޖޭގައި އިންޑިއާގެ ހެލިކޮޕްޓަރު ބޭއްވުމުގެ މުއްދަތު އިތުރުކުރަން މަޝްވަރާކުރައްވާފަ އެވެ.

އިންޑިއާގެ ހެލިކޮޕްޓަރު ރާއްޖޭގައި ބޭއްވުމުގެ މުއްދަތު އިތުރުކުރަން ޣައްސާން މަޝްވަރާކުރައްވާފައިވާއިރު، މިދިޔަ ފަސް އަހަރުގެ ތެރޭގައި އޭރުގެ އިދިކޮޅު ފަރާތްތަކުން ބޭއްވި އެކި ރެލީތަކުގައި އޭނާ ވަނީ އެކަމާ ދެކޮޅަށް އަޑުއުފުލާފަ އެވެ.

ރައީސް ޑރ. މުހައްމަދު މުއިއްޒު ވެސް އެކަމާ ދެކޮޅު ހަދާފައިވެ އެވެ. އިންޑިއާގެ މިލިޓަރީ ރާއްޖެއިން ބޭރުކުރުމަކީ ރައީސް މުއިއްޒުގެ ވައުދަކަށްވާއިރު، ވެރިކަމަށް ވަޑައިގަތުމަށްފަހު ވަނީ އިންޑިއާގެ ހެލިކޮޕްޓަރު ރާއްޖެއިން ފޮނުވާނުލާން ނިންމަވާފަ އެވެ. އަދި އިންޑިއާގެ ޔުނީފޯމްއެޅި ސިފައިން ފޮނުވާލުމަށްފަހު، ހެލިކޮޕްޓަރު އޮޕަރޭޓްކުރަން މިލިޓަރީ ތަމްރީނު ލިބިފައިވާ ޔުނީފޯމް ނާޅާ ބަޔަކު ގެންނަން އެމަނިކުފާނު ނިންމެވި އެވެ.

ލ. ކައްދޫ އާއި ސ. ގަމުގައި، މަދަނީންގެ ނަމުގައި ގެނައި އިންޑިއާގެ މީހުން ބޭތިއްބުމަށް ހެދި އެއްބަސްވުމުގެ މުއްދަތު ހަމަވާނީ ފެބްރުއަރީ، 2025، ގައި އެވެ. އަދި ހދ. ހަނިމާދޫގައި އެ މީހުން ބޭތިއްބުމަށް ހެދި އެއްބަސްވުމުގެ މުއްދަތު ހަމަވާނީ ފެބްރުއަރީ، 2026، ގަ އެވެ.