އަލްހިޖްރަ ގްރޫޕްގެ ހަވާލުގައި ރާއްޖެއިން އުމްރާއަށް ދިޔަ 24 މީހަކު ރާއްޖެ ނާދެވި ސައުދިއަރަބިއާގައި ތާށިވި މައްސަލައިގައި ފިޔަވަޅު އަޅުއްވާނެކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިދިޔަ ޑިސެމްބަރު މަހު އެ ގްރޫޕްގެ ހަވާލުގައި އުމުރާއަށް ދިޔަ މީހުނަށް ރާއްޖެ ނާދެވި ސައުދީގައި ތާށިވުމާއި ގުޅިގެން ހައްޖު ކޯޕަރޭޝަނުން ދަނީ އެމީހުން ގެނައުމުގެ މަސައްކަތް ކުރަމުންނެވެ.

އަލްހިޖްރަ އުމްރާ ގްރޫޕުގެ ހަވާލުގައި ދިޔަ 18 އުމްރާވެރިއަކު ދިޔައީ އެ ގްރޫޕަށް ފައިސާ ދައްކައިގެންނެވެ. އަދި ބާކީ ހަ މީހުންނަކީ އެހީތެރިންނާއި ސްޕޮންސާގެ ގޮތުގައި ފޮނުވި މީހުންނެވެ.

މި މައްސަލަ ފެންމަތިވުމާ ގުޅިގެން އެ ގުރޫޕުން ނެރުނު ބަޔާނެއްގައި ބުނީ ޑިސެންބަރު އުމްރާއަށް ގެންދިޔަ 24 މީހަކު ރާއްޖެ ނުގެނެވި ތާށިވެފައިވާ ކަމަށެވެ. މިގޮތަށް ދިމާވީ ކުންފުންޏަށް ދިމާވި މާލީ ދަތިތަކެއްގެ ސަބަބުން ކަމަށާ އެކަން ހައްލު ކުރުމަށް މަސައްކަތް ކުރަމުންދާ ކަމަށް އެ ގުރޫޕުން ބުނެފައިވެ އެވެ.

އިސްލާމިކް މިނިސްޓަރު ޝަހީމް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ ހިޖުރަ ގުރޫޕުގެ ހަވާލުގައި އުމްރާއަށް ދިޔަ މީހުންނަށް އަނބުރާ ރާއްޖެއަށް އާދެވޭނެ މަގު ފަހިކޮށްދިނުމަށް މިނިސްޓްރީއަށް ވެވެން އޮތް ހުރިހާ އެހީތެރިކަމެއް ވެދިނުމުގެ މަސައްކަތް ކުރަމުން އަންނަކަމަށެވެ.

ޝަހީމް ވިދާޅުވީ އުމްރާވެރިން ހާލުގައި ޖެއްސި ކުންފުންޏަށް އުސޫލުގެ ދަށުން މިއަދު ފިޔަވަޅު އަޅުއްވާނެ ކަމަށެވެ.

ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ‏ވިދާޅުވީ ހިޖްރަ ޖަމާއަތުގެ ހަވާލުގައި އުމްރާގެ އަޅުކަމަށް މައްކާއަށް ދިޔަ ދިވެހިންތަކެއް ހާލުގައިޖެހިފައިވާތީ އެމީހުން އަނބުރާ ރާއްޖެއަށް ގެނައުމަށް ކުރަންޖެހޭ ކަންކަމުގެ އިންތިޒާމުތައް ހަމަޖެއްސުމަށް ކޯޕަރޭޝަނުން މަސައްކަތް ކުރަމުންދާ ކަމަށެވެ.