ދިރިއުޅުމުގައި ކާމިޔާބީއާ ހަމައަށް ވާސިލްވާން ގިނަ ކަންތައްތަކެއް ކުރަންޖެހެ އެވެ. ތިބާގެ ދިރިއުޅުން ވަކި ގޮތަކަށް ބައްޓަން ކުރަން ޖެހެ އެވެ.

އެގޮތުން އެންމެ މުހިއްމު ކަމަކަށް ދިރިއުޅުމަށް ގެންނަންޖެހޭ ބަދަލަކީ ތިބާގެ އުފެއްދުންތެރިކަން އިތުރު ކުރުމެވެ. ދުވާލުގެ ވަގުތު ކުރަންޖެހޭ ކަންކަމަށް ބަހާލައި އެންމެ އެދެވޭ ގޮތަށް އެކަންކަން ކުރުމެވެ.

މިއީ ގިނަ ބަޔަކަށް ކުރަން އުނދަގޫ ކަމެއްކަން ފާހަގަ ކުރަން ޖެެހެ އެވެ. އެކި ސަބަބުތަކާހުރެ ދުވަހުގެ ތާވަލަށް އަމަލު ނުކުރެވި ދޫކޮށްލެވެ އެވެ. މި ލިޔުމުގައި މި ބަލާލަނީ މި އާދަ ދޫކޮށް ދިރިއުޅުމުގައި އުފެއްދުންތެރިކަން އިތުރުކުރާނެ ބައެއް އުކުޅުތަކަށެވެ.

ވަގުތު ކަނޑައެޅުމުގައި ވިސްނުން

ދުވާލުގެ ވަގުތު އެކި ކަންކަމަށް ކަނޑައެޅުމުގައި ވިސްނުންތެރިކަމާއެކު އަމަލު ކުރާށެވެ. އެންމެ ގިނަ ވަގުތު ބޭނުންވާ ކަންކަން ފާހަގަކޮށް އެކަންކަމަށް ސަމާލުކަން ދޭށެވެ. ޖެހިޖެހިގެން ބުރަ މަސައްކަތްތަކެއް ތާވަލު ކުރުމުގެ ބަދަލުގައި އަމިއްލަ ނަފްސަށް "ބްރޭކެއް" ދޭން އާދަ ކުރާށެވެ.

އެއްފަހަރާ ގިނަ ކަންތައްތައް ކުރަން ނޫޅުން

ގިނަ ބަޔަކު ދެކޭ ގޮތުގައި އެއްފަހަރާ އެއްކަމަކަށްވުރެ ގިނަ ކަންތައް ކުރުން ނުވަތަ "މަލްޓި ޓާސްކިން"އަކީ ވަގުތު ސަލާމަތް ކޮށްދޭ ކަމެކެވެ. އެހެން ނަމަވެސް އެއީ ކޮންމެ ކަމަކަށް ދޭންވާ ފަރުވާތެރިކަން ފުރިހަމަ ގޮތުގައި ނުދެވި ކުރާ ކަންކަމުގެ ފެންވަރު ދަށްކުރުވާ ކަމެކެވެ. އޭގެ ބަދަލުގައި ކުރާ އެއް ކަމަކަށް ތިމާގެ ސަމާލުކަން ހުއްޓުވުމަކީ ވަގުތު ސަލާމަތްވެ މަސައްކަތުގެ ފެންވަރު ވެސް ރަނގަޅުވާނެ ކަމެކެވެ.

ނިދުމުގެ ކުރިން މިއަދާއި މާދަމާއަށް އަލިއަޅުވާލުން

ކޮންމެ ދުވަހަކު ވެސް ނިދުމުގެ ކުރިން މިއަދު ކުރެވުނު ކަންތައްތަކާއި ނުކުރެވި ހުރި ކަންތައްތައް ފާހަގަ ކުރާށެވެ. އެއާއެކު ނުކުރެވި ހުރި ކަންކަން މާދަމާގެ ތާވަލުގައި ހިމަނަން އަމިއްލައަށް އަޒުމު ކަނޑައަޅާށެވެ. ޖެހިގެން އަންނަ ދުވަސް އޭގެ ކުރީ ދުވަހު ނުކުރެވުނު ކަންތައްތަކުން ފަށައިގަންނާށެވެ.