އުމްރާއަށް މީހުން ގެންގޮސް ހާލުގައިޖެއްސި އަލްހިޖްރަ ގްރޫޕްގެ ހުއްދަ ހިފަހައްޓައި އެއްލައްކަ ރުފިޔާއިން ޖޫރިމަނާކޮށް، އެ ގްރޫޕްގެ މައްސަލަ ތަހުގީގުކުރުމަށް ފުލުހުންނަށް ހުށަހަޅައިފި އެވެ.

އިސްލާމިކް މިނިސްޓްރީން އަލްހިޖްރަ ގްރޫޕާ ދެކޮޅަށް ފިޔަވަޅުތަކެއް އަޅަން ނިންމީ އެ ގްރޫޕުން އުމްރާއަށް މީހުން ގެންދިޔުމާ ބެހޭ އުސޫލާ ހިލާފުވުމުންނެވެ.

އިސްލާމިކް މިނިސްޓްރީން ބުނީ އަލްހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުން މިދިޔަ ޑިސެންބަރު މަހު އެ ގްރޫޕްގެ ހަވާލުގައި އުމްރާއަށް ދިޔަ މީހުންގެ ދެކޮޅު ޓިކެޓް ހަމަނުޖައްސައި، އެކަމަށް ހުރި ފައިސާ އެހެން ކަންކަމަށް ބޭނުންކޮށްފައިވާ ކަމަށް އެކުންފުނިން އިއުތިރާފުވެފައިވާ ކަމަށެވެ.

އުމްރާއަށް ދިޔަ މީހުންގެ ދެކޮޅު ޓިކެޓް ހަމަނުޖައްސައި އޮތުމުން މައްކާއިން ރާއްޖެ އައުމަށް ޓިކެޓު ނެގުމުގެ ދަތިކަން ދިމާވެ، އެ ގްރޫޕްގެ ހަވާލުގައި އުމްރާއަށް ދިޔަ މީހުން އިސްލާމިކް މިނިސްޓްރީގެ އެހީތެރިކަމަށް އެދުނު ކަމަށް އެ މިނިސްޓްރީން ބުނެ އެވެ. އަދި އުމްރާއަށް ދިޔަ މީހުން އިސްލާމިކް މިނިސްޓްރީގެ އެހީތެރިކަމަށް އެދުމުން ރާއްޖެ ނާދެވި ތިބި 23 އުމްރާވެރިން މޯލްޑިވްސް ހައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް މިހާރު ގެންގޮސްފައިވާ ކަމަށް އިސްލާމިކް މިނިސްޓްރީން ބުނެ އެވެ.

އުމްރާއަށް ދިޔަ މީހުން ހާލުގައި ޖެއްސުމުން އިސްލާމިކް މިނިސްޓްރީން ވަނީ އުމްރާއަށް މީހުން ގެންދިޔުމުގެ އުސޫލުގެ ދަށުން އަލްހިޖްރަ ޕްރައިވެޓް ލިމިޓެޑަށް ބޮޑެތި ފިޔަވަޅުތަކެއް އަޅުއްވާފަ އެވެ. އެގޮތުން އުމްރާއަށް މީހުން ގެންދިޔުމަށް އެ ކުންފުންޏަށް ދޫކޮށްފައިވާ ހުއްދަ ވަނީ ހިފަހައްޓާފަ އެވެ. އަދި 100،000 ރުފިޔާއިން ޖޫރިމަނާކޮށް އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިއުމުގެ ހުއްދަ ނުދިނުމަށް ވަނީ ނިންމައިފަ އެވެ.

މީގެ އިތުރުން އެ ކުންފުނިން ޢުމްރާއަށް ގެންދިޔަ މީހުން ހާލުގައި ޖައްސާ، އެމީހުން ރާއްޖެ ގެނައުމަށް އިސްލާމިކް މިނިސްޓްރީން ކުރި ޚަރަދު އެ ކުންފުނިން ހޯދުމަށް ވެސް ނިންމާފައިވާ ކަމަށް ބުނެ އެވެ. މި ފިޔަވަޅުތަކުގެ އިތުރުން މި މައްސަލަ އިތުރަށް ތަހުގީގުކޮށް ގާނޫނީ ފިޔަވަޅު އެޅުމަށް ފުލުހުންނަށް ވެސް ހުށަހަޅާފައިވާ ކަމަށް އިސްލާމިކް މިނިސްޓްރީން ބުނެ އެވެ.

އިސްލާމިކް މިނިސްޓްރީން ބުނީ އަލްހިޖުރަ ކުންފުނީގެ ހަވާލުގައި އުމްރާއަށް ގޮސް ހާލުގައި ޖެހިފައި ތިބި މީހުން ހޮނިހިރު ދުވަހު މާލެ ގެނައުމުގެ މަސައްކަތް ކުރަމުން އަންނަ ކަމަށެވެ. އަދި އެމީހުން ރާއްޖެ އާދެވެންދެން ކެއިންބުއިމާއި ހުރުމުގެ އިންތިޒާމުތައް ހައްޖު ކޯޕަރޭޝަނުން ހަމަޖައްސައިދޭނެ ކަމަށް ވެސް އެ މިނިސްޓްރީން ބުނެ އެވެ.

އުމްރާއަށް މީހުން ގެންދިޔުމުގައި އެކި ފަރާތްތަކުން މަކަރާއި ހީލަތް ހަދާ މައްސަލަތައް މީގެ ކުރިން ވެސް ފެންމަތިވެފައިވެ އެވެ. މިގޮތުން އިތުރަށް ފައިސާނެގުމުގެ މައްސަލަތަކާއި އުމްރާގެ އަޅުކަން އަދާކުރުމަށްފަހު އެނބުރި ރާއްޖެ އައުމުގައި ބައެއް މީހުންނަށް ދަތިތަކާ ކުރިމަތިވެފައިވެ އެވެ.

އިސްލާމިކް މިނިސްޓްރީން އެކުލަވާލާފައިވާ އުމްރާއަށް މީހުން ގެންދިޔުމުގެ އުސޫލްގައިވާ ގޮތުން އެއްބަސްވުމާ ޚިލާފު ވެއްޖެނަމަ، މައްސަލައިގެ ކުޑަ ބޮޑު މިނަށް ބެލުމަށްފަހު 1000 ރުފިޔާ އާއި 1،00،000 އާ ދެމެެދުގެ އަދަދަކުން ޖޫރިމަނާ ކުރުމުގެ އިޚުތިޔާރު އެ އެމިނިސްޓްރީއަށް ލިބެ އެވެ. އަދި އުމްރާއަށް ގެންދިޔުމުގެ ހުއްދަ ނެތި އެއްވެސް ބަޔަކު އުމްރާއަށް ގެންގޮސްފިނަމަ އެ ބަޔަކު 1،00،000 އާއި 5،00،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ އެވެ.