ފުވައްމުލައް ސިޓީގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމުގެ ތުހުމަތު ކުރެވޭ ދެ މީހުން ދޫކޮށްލަން ހައިކޯޓުން އަމުރުކޮށްފި އެވެ.

"އޮޕަރޭޝަން ވެށި ރައްކަލް"ގެ ނަމުގައި ފުލުހުން މިދިޔަ ޑިސެމްބަރު މަހުގެ ނުވަ ވަނަ ދުވަހު ފުވައްމުލަކުގައި ކުރިއަށް ގެންދިޔަ ހާއްސަ އޮޕަރޭޝަންގައި ހައްޔަރުކުރީ ފުވައްމުލައް، ދޫޑިގަން، ކަރަންކާވިލާ، އަހްމަދު ނިއުޝާދު،34، އާއި، ފުވައްމުލައް، ދޫޑިގަން، ޒަމާނީގެ، ހަސަން އާޒިމް،29، އެވެ.

އެ ދެ މީހުން ހައްޔަރުކޮށް ބަންދާ މެދު ގޮތެއް ނިންމަން އެންމެ ފުރަތަމަ ހާޒިރުކުރީ ފުވައްމުލަކު ކޯޓަށެވެ. އެ ކޯޓުން އަމުރުކުރީ ޝަރީއަތް ނިމެންދެން އެ ދެ މީހުން ބަންދުގައި ބެހެއްޓުމަށެވެ.

އެ މައްސަލަ އެ ދެ މީހުންގެ ފަރާތުން އިސްތިއުނާފުކުރުމުން އެ މައްސަލަ ބެލުމަށްފަހު ހައިކޯޓުން އިއްވި ހުކުމްގައި ވަނީ އެމީހުން ޝަރީއަތް ނިމެންދެން ބަންދުކުރަން އަމުރުކުރިއިރު ހެކި ހުރި މިންވަރު ބެލި ގޮތް ގޯސް ކަމަށެވެ. އެހެންވެ އެމީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށް ހައިކޯޓުން ވަނީ ކަނޑައަޅާފަ އެވެ.

ހައިކޯޓުގެ ހުކުމް އިސްތިއުނާފު ކުރާނެ ކަމެއް ފުލުހުން އަދި ހާމައެއް ނުކުރެ އެވެ.

އެ އޮޕަރޭޝަންގައި 4,048 ހޮޓްސްޕޮޓް ބަލައި ފާސްކޮށް، 1,147 މީހުން ހުއްޓުވައި ސުވާލުކޮށް ބަލައި ފާސްކޮށް، 58 މީހަކު ހައްޔަރުކުރި ކަމަށް ފުލުހުން ބުންޏެވެ.

ފުލުހުން ބުނީ ފަސް އަހަރު ތެރޭގައި އަހްމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ތަހުގީގަށް ފާހަގަވެފައިވާ ކަމަށެވެ. އަދި ފާއިތުވި ދެ އަހަރު ތެރޭގައި ހަސަން އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާކަން ފާހަގަކުރެވޭ ކަމަށް ވެސް ފުލުހުން ބުންޏެވެ.

މި މައްސަލައާ ގުޅިގެން 21 މީހަކާއި ދެ ކުންފުންޏެއްގެ ބޭންކު އެކައުންޓް ކޯޓު އަމުރުގެ ދަށުން ވަނީ ހިފަހައްޓާފަ އެވެ.