އެމެރިކާގެ ކެލިފޯނިއާގެ ލޮސްއެންޖެލެސްގައި ރޯވެ އަނދަމުންދާ އަލިފާނުގެ ސަބަބުން އެތައް ހާސް އިމާރާތްތަކެއް އަނދާ ހުލިވެފައިވާއިރު އޭގެ ތެރޭގައި މަޝްހޫރު ފިލްމީ ތަރިންނާއި މަހުޖަނުންގެ އަގުބޮޑު ގެތައް ވެސް ހިމެނޭ ކަމަށް އެމެރިކާގެ މީޑިއާ ރިޕޯޓުތަކުން ބުނެފި އެވެ.

ރިޕޯޓުތައް ބުނާގޮތުން އަލިފާންގަނޑު ރޯވެ އަނދަމުންދާ ސަރަހައްދުން ރައްކާތެރި ސަރަހައްދުތަކަށް ގެންދެވުނު މީހުންގެ ތެރޭގައި ވެސް ހޮލިވުޑްގެ މަޝްހޫރު ތަރިން ހިމެނެ އެވެ.

ފިލްމީ ތަރިންނާއި ބިލިއަނައަރުން ދިރިއުޅޭ އަގުބޮޑު ސަރަޙައްދުތައް ހިމެނޭ ގޮތަށް، އަލިފާން ރޯވަމުންދާއިރު ޕެރިސް ހިލްޓަނާއި އެކްޓަރު ބިލީ ކްރިސްޓަލްގެ އަމިއްލަގެ ވަނީ އަނދައިގެން ގޮސްފަ އެވެ.

އޮސްކާ ކާމިޔާބުކޮށްފައިވާ ލަވަކިޔުންތެރި ޑައިއޭން ވޮރެން، ޓޯކް ޝޯ ހޯސްޓް ރިކީ ލޭކް، އެކްޓަރު ކެރީ އެލްވެސް އަދި ރިއަލިޓީ ސްޓާރުންކަމަށްވާ ސްޕެންސާ ޕްރެޓް އަދި ހައިޑީ މޮންޓާގް ވެސް ވަނީ އެ މީހުންގެ ގެތައް އަނދާހުލިވެއްޖެ ކަމަށް ބުނެފަ އެވެ.

އެމެރިކާގެ މީޑިއާތަކުން ރިޕޯޓުކުރާ ގޮތުގައި ޔޫޖީން ލެވީ އަދި އެޑަމް ބްރޯޑީ އަދި ލެއިޓަން މީސްޓަ ވެސް ގެދޮރު އެނދި މީހުންގެ ތެރޭގައި ހިމެނެ އެވެ.

މީޑިއާ ރިޕޯޓުތައް ބުނާ ގޮތުގައި ޓޮމް ހޭންކްސް، ބެން އެފްލެކް ހިމެނެނީ އެ ސަރަހައްދުން ރައްކާތެރި ސަރަހައްދަކަށް ގެންދެވުނު މީހުންގެ ތެރޭގަ އެވެ.

ސެންޓާ މޮނިކާ އާއި މަލިބޫގެ ދެމެދުގައިވާ ފަރުބަދައިގެ ސަރަޙައްދެއްކަމަށްވާ ޕެސިފިކް ޕެލިސޭޑްސްގައި ރޯވަމުންދާ އަލިފާނަކީ ކެލިފޯނިއާގައި މިވަގުތު އަދަމުންދާ ފަސް ސަރަހައްދުގެ ތެރެއިން އެންމެ ނުރައްކާތެރި އަލިފާންގަނޑު ކަމަށް ރިޕޯޓުތައް ބުނެ އެވެ.

މި ސަރަޙައްދަކީ މަޝްހޫރު މީހުންގެ އަގުބޮޑު ގެތައް ގިނައިން ހުންނަ ސަރަޙައްދެކެވެ. ފެތުރެމުންދާ އަލިފާނުގެ ސަބަބުން މިހާތަނަށް މަދުވެގެން 10 މީހުން މަރުވެފައިވާ ކަމަށް އޮފިޝަލުން ވަނީ ހާމަ ކޮށްފަ އެވެ.