ސިކުންތަކު 100 ޖީބީގެ ދުވެލީގައި އަގުހެޔޮކޮށް ރާއްޖެއަށް އިންޓަނެޓްގެ ހިދުމަތް ފޯރުކޮށްދިނުމަށް ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ބައިނަލްއަގުވާމީ ސަބްމެރިން ކޭބަލް ޕްރޮޖެކްޓް މި ސަރުކާރުގެ ސަަބަބުން ފެނަށް ވެދާނެ ކަމުގެ ބިރުހީވެއްޖެ އެވެ.

ސަރުކާރު ހިއްސާވެގެން އަަޅާ ފުރަތަމަ ސަބްމެރިން ކޭބަލް އެޅުމަށް އިންޑިއާގެ އެންމެ މުއްސަނދި މީހާ، މުކޭޝް އަމްބާނީގެ ރިލަޔަންސް ޖިއޯ ކުންފުންޏާ އެކު މިދިޔަ ސަރުކާރުން ސޮއިކުރީ ފެބްރުއަރީ 21، 2022 ވަނަ ދުވަހު އެވެ. އަދި ސަބްމެރިން ކޭބަލް ރާއްޖެއާ ގުޅާލީ އޮގަސްޓް 11، 2023 ވަނަ ދުވަހު އެވެ.

އޯޝަން ކަނެކްޓްގެ ނަމުގައި ފެށި އެ ޕްރޮޖެކްޓަކީ ދިވެހި ރައްޔިތުންނަށް ހަލުވި ދުވެއްޔެއްގައި އަގުހެޔޮކޮށް އިންޓަނެޓްގެ ހިދުމަތް ފޯރުކޮށްދިނުމަށްޓަކައި ފެށި ޕްރޮޖެކްޓެކެވެ.

ރިލަޔަންސް ކުންފުންޏަށް ދައްކަންޖެހޭ ފައިސާގެ ތެރެއިން 12 މިލިއަން ޑޮލަރު މިދިޔަ ސަރުކާރުން ވަނީ ދައްކައިފަ އެވެ. މިދިޔަ ސަރުކާރު ނިމުނުއިރު، އެ ކުންފުންޏަށް ދައްކަންޖެހޭ ބާކީ ފައިސާގެ އަދަދަކީ 15 މިލިއަން ޑޮލަރެވެ. އެކަމަކު މި ސަރުކާރަށް އެއް އަހަރު ވެގެންދިޔައިރު ވެސް އެ ފައިސާ ދައްކާފައެއް ނުވެ އެވެ.

އެނގިފައިވާގޮތުގައި މިދިޔަ ޑިސެމްބަރު މަހުގެ ތެރޭގައި އެ ކުންފުނިން ވަނީ ނުދެއްކިހުރި ފައިސާ އާއި ޖޫރިމަނާގެ ފައިސާ ދެއްކުމަށް 30 ދުވަހުގެ މުއްދަތެއް ދީފަ އެވެ. އަދި އެ ފައިސާ ނުދެއްކިއްޖެނަމަ އެ ކޭބަލް ވިއްކާލަން 60 ދުވަހުގެ މުއްދަތެއް އެ ކުންފުނިން ދީފައިވާކަން ވަނީ އެނގިފަ އެވެ.

ފޮރިން މިނިސްޓަރު ޑރ. އަބްދުﷲ ހަލީލް ދާދިފަހުން އިންޑިއާއަށް ކުރެއްވި ދަތުރުފުޅުގައި ވެސް އެ ކޭބަލް ވިއްކުން ހުއްޓުވައިދިނުމަށް އެދިވަޑައިގަތެވެ. ނަމަވެސް އެކަމާ ބެހޭ ބޭފުޅުން ހަލީލަށް ދިން ޖަވާބަކީ "މިހާރު މާލަސްވެއްޖެ" ކަމަށެވެ.

އެނގިފައިވާގޮތުގައި ރިލަޔަންސް އިން އަންނަނީ އެ ކޭބަލް ވިއްކުމާ ގުޅޭގޮތުން ބައެއް އެހެން ގައުމުތަކާއެކު މަޝްވަރާ ކުރަމުންނެވެ.

މިކަމާ ގުޅޭގޮތުން ގިނަ ބަޔަކު އަންނަނީ މި ސަރުކާރަށް ފާޑުކިޔަމުންނެވެ. އެމްޑީޕީގެ ގާނޫނީ ޓީމްގެ މެމްބަރެއް ކަމަށްވާ އަހުމަދު މައުރޫފް އެކްސްގައި ވިދާޅުވީ ސަރުކާރުން އަޅާ ސަބްމެރިން ކޭބަލަށް ދައްކަންޖެހޭ ފައިސާ ނުދެއްކުނީ މި ސަރުކާރުގެ ނާގާބިލު ކަމުން ކަމަށެވެ.

އޭނާ ވިދާޅުވީ 30 މިލިއަން ޑޮލަރު ހަރަދުކޮށްގެން ޑްރޯން ގަތުމުގެ ބަދަލުގައި، ސަބްމެރިން ކޭބަލަށް ދައްކަންހުރި ފައިސާ އެ ފައިސާގެ ތެރެއިން ދެއްކިނަމަ މިހާރު އެކަން އޮންނާނީ ކުރެވިފައި ކަމަށެވެ.

އެ ސަބްމެރިން ކޭބަލްގެ މަޝްރޫއަކީ އިގްތިސޯދީގޮތުން ވެސް ރާއްޖެއަށް ފައިދާތަކެއް ހޯދުމުގެ މަގްސަދު ވެސް ނިމިދިޔަ ސަރުކާރުން ގެންގުޅުނު މަޝްރޫއެކެވެ. އެގޮތުން އެ މަޝްރޫއު ނިމުމުން ރާއްޖެއިން ބޭރު ގައުމުތަކަށް އިންޓަނެޓް ވިއްކައިގެން ބޮޑު އާމްދަނީއެއް ހޯދުމަކީ ވަރަށް ބޮޑު އަމާޒެއް ކަމަށް އޭރުގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެފައިވެ އެވެ. ނަމަވެސް މި ސަރުކާރުގެ އަމަލުތަކުގެ ސަބަބުން އެކަން ވެސް ދެން ހާސިލެއް ނުވާނެ އެވެ.

މިކަމާ ގުޅިގެން ސަރުކާރުން އެއްވެސް ބަހެއް ނުބެ ސޯޝަލް މީޑިއާ އެކްޓިވިސްޓުން ލައްވައި އަންނަނީ އެކަމުގައި ކުރީ ސަރުކާރު ކުށްވެރިކޮށް ޕޯސްޓްތަކެއް ކުރަމުންނެވެ.

ނަމަވެސް ޕީއެންސީގެ އެކްޓިވިސްޓުން ފުތުރާ ވާހަކަތަކުގައި އެއްވެސް އަސާސެއް ނެތުމުން ގިނަ ބަޔަކު އަންނަނީ އެ ވާހަކަތަކަށް ރައްދު ދެމުންނެވެ.