އެމެރިކާގެ ލޮސް އެންޖެލިސްގައި ރޯވެފައިވާ އަލިފާންގަނޑުތަކުގެ ސަބަބުން އެ ތަނުގެ ވައި ތަޣައްޔަރުވުމާ ގުޅިގެން އާންމު ސިއްހަތަށް ބޮޑެތި ނުރައްކާތަކެއް ކުރިމަތިވެފައިވާ ކަން މީޑިއާ ރިޕޯޓުތަކުން ބުނެފި އެވެ.

އެމެރިކާގެ ކަމާ ގުޅޭ އިދާރާތަކާއި ހަވާލާދީ މީޑިއާ ރިޕޯޓުތައް ބުނެފައިވަނީ އެންޖެލިސްގައި ރޯވެފައިވާ އަލިފާން ގަނޑުތަކާއި ގުޅިގެން އެމެރިކާގެ ދެވަނައަށް އެންމެ އާބާދީ ބޮޑު ލޮސް އެންޖެލީސްގެ އިދާރާތަކުން ވަނީ، ސިއްހީ ގޮތުން ރައްކާތެރިކަމުގެ ފިޔަވަޅުތައް އެޅުމަށް އާންމު ރައްޔިތުންނަށް އިރުޝާދު ދީފަ އެވެ.

ލޮސް އެންޖެލީސްގެ ޖަންގަލިތަކުގައި ރޯވި އަލިފާންގަނޑު އާންމުން ދިރިއުޅޭ ސަރަޙައްދުތަކަށް ފެތުރި 10,000 އަށް ވުރެ ގިނަ ގެދޮރާއި އެހެން އިމާރާތްތައް ވަނީ އަނދައި އަޅިއަށް ވެފަ އެވެ. އަދި، މަރުވެފައިވާ މީހުންގެ އަދަދު ވަނީ 11 އަށް އުފުލިފަ އެވެ.

އަލިފާނުގެ ސަބަބުން އެންމެ ބޮޑެތި ގެއްލުންތަކެއް ލިބިފައިވާ ސަރަޙައްދުތަކުގެ ތެރޭގައި ޕެލިސޭޑްސްގެ އިތުރުން ސެންޓެ މޮނިކާއާއި މެލިބޫއާ ދެމެދުގައިވާ ސަރަޙައްދުތަކާއި ޕެސެޑީނާގެ އީޓަން ސަރަހައްދު ހިމެނެ އެވެ.

ލޮސް އެންޖެލީސްގައި ރޯފައިވާ އަލިފާންގަނޑުތަކާއި ގުޅިގެން، ވައި ތަޣައްޔަރުވެފައިވާ ކަމުގެ އިންޒާރު ކަމާ ގުޅޭ އިދާރާތަކުން ވަނީ ކޮށްފަ އެވެ. އަދި، ސިއްހަތަށް ނުރައްކާވުމުގެ ފުރުސަތު ބޮޑު ކަމަށް ބުނެ ސައިންސްވެރިން ވެސް ވަނީ އިންޒާރު ކޮށްފަ އެވެ.

ލޮސްއެންޖަލިސްގެ ސްކޫލުތައްވެސް ބަންދު ކޮށްފައިވާއިރު، އެތަކެއް ސަތޭކަ ހާސް ބަޔަކު ވަނީ ރައްކާތެރި ހިސާބުތަކަށް ބަދަލުވެފަ އެވެ. ނަމަވެސް، އަމިއްލަ ގެދޮރުގައި އެތަކެއް ސަތޭކަ ހާސް ބަޔަކު އަދިވެސް ތިބީ ތާށިވެފަ އެެވެ.

މި ކަމުން ރައްކާތެރިކަން ހޯދުމަށް، ލޮސް އެންޖެލީސްގައި ދިރިއުޅޭ ގިނަ އަދަދެއްގެ ބަޔަކު ވަނީ ވައި ސާފު ކުރުމަށް ބޭނުން ކުރާނެ "އެއާ ޕިޔުރިފަޔާ" ފަދަ އާލާތްތައް ގަނެ، ބޭނުން ކުރަން ފަށާފަ އެވެ.

ފިހާރަތަކުގައި އެ ފަދަ އާލާތްތަކުގެ ވިޔަފާރި އިތުރުވެފައިވާ ކަމުގައި ރިޕޯޓުތައް ބުނެ އެވެ. ބައެއް ރައްޔިތުން ދަނީ، ގެދޮރަށް ނުރައްކާތެރި އަދި ވިހަ ދުން ވަނުމުގެ ފުރުސަތު ބަންދު ކުރުމަށް ފިޔަވަޅުތައް އަޅަމުންނެވެ. ގޭގައި ތިބުމަށް އެ ރަށުގެ އިދާރާތަކުން ވަނީ އާންމު ރައްޔިތުންނަށް އިރުޝާދު ދީފަ އެވެ.

އަލިފާނުގައި ގެދޮރު ނެތިފައިވާ ގިނަ އަދަދެއްގެ ބަޔަކަށް ޕެސެޑީނާގައި ހުންނަ ޕެސެޑީނާ ކޮންވެންޝަން ސެންޓަރުގައި ވަގުތީ ހިޔާވަހިކަން ފޯރުކޮށްދީފައިވާއިރު، އެ ތަނުގައި ދިރިއުޅެމުންދާ މީހުންނަށް 'އެން95' މަރުކާގެ މާސްކު ފޯރުކޮށްދިނުމަށް ވެސް އޮފިޝަލުން ދަނީ މަސައްކަތް ކުރަމުންނެވެ. މި ކަމުގައި މަދަނީ ޖަމުޢިއްޔާތަކުން ވެސް ދަނީ ސަރުކާރުގެ އިދާރާތަކަށް އެހީތެރިކަން ފޯރުކޮށްދެމުންނެވެ.

ފުރާނައަށް ނުރައްކާވައި ތަޣައްޔަރުވުމުގެ ސަބަބުން ނޭވާލާ ނިޒާމުތައް މައްސަލަތަކަށް ހުށަހެޅިފައިވާ ގިނަ މީހުންނަކީ ގެދޮރު ނެތް ނިކަމެތީން ކަމުގައި ލޮސް އެންޖެލީސްގައި ހިންގާ ކުއްލި ހާލަތްތަކަށް އިޖާބަދޭ ޕްރޮގްރާމެއްގެ މެނޭޖަރު ސަނީ ލީ ބުންޏެވެ.

ލޮސް އެންޖެލީސްގެ ޖަންގަލިތަކުގައި ރޯވެ އަނދަން ފަށާފައި ވަނީ، ވާރޭ ނުވެހި ގިނަ ދުވަސްވުމާ ގުޅިގެން އާދަޔާ ޚިލާފަށް ހޫނުގަދަވެ، ޖަންގަލިތަކުން ފެން ހިނދި، ހަނަފަސްވެފައިވާ ދަނޑިވަޅެއްގަ އެވެ. ލޮސްއެންޖަލީސްގެ ފަސް ސަރަޙައްދެއްގައި ރޯވި އަލިފާންގަނޑުތަކާ އެކު، 13,760 ހެކްޓަރުގެ ބިމާއި، 10,000އަށްވުރެ ގިނަ ގެދޮރާއި އިމާރާތް ވަނީ އަނދައި އަޅިއަށްވެފަ އެވެ. ބައެއް އަވަށްތައް ވަނީ މުޅިން ސުންނާފަތިވެފަ އެވެ.