ރައީސް ޑރ. މުހައްމަދު މުއިއްޒުގެ އެންގެވުމަށް ވެރިކަންކުރާ ޕީއެންސީއަށް 100،000 މީހުން ހަމަކުރުމަށް ހިންގާ ހަރަކާތުގެ ތެރެއިން ވަގު ފޯމްތަކެއް އިލެކްޝަންސް ކޮމިޝަނަށް ހުށަހެޅި މައްސަލައާ ގުޅިގެން ހޯމް މިނިސްޓަރު އަލީ އިހްސާނާ ސުވާލުކުރެއްވުމަށް ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމް ރައްޔިތުންގެ މަޖިލީހަށް ހުށަހަޅައިފި އެވެ.

މީކާއީލް ފޮނުވާފައިވާ ސުވާލުކުރުމުގެ ނޯޓިސްގައި ވަނީ ހޯމް މިނިސްޓްރީގެ ދަށުން ހިންގަމުންދާ ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)ގެ ޑޭޓާބޭސް ބޭނުންކޮށްގެން މީހުންގެ ޝަޚްސު އޮޅުވާލައި ޕީއެންސީއަށް މެންބާޝިޕް ފޯމު ފުރާވާކަން ހާމަވެފައިވާ ކަމަށެވެ.

އެހެންކަމުން މީހުންގެ ޒާތީ މައުލޫމާތު އިތުރަށް ރައްކާތެރިކުރުމަށް އަޅަނީ ކޮން ފިޔަވަޅެއްތޯއާއި ވަގު ފޯމުތަކުގައި ހެކިންގެ ގޮތުގައި ސޮއިކޮށްފައިވާ ހޯމް މިނިސްޓްރީގެ އިސްވެރިންނާމެދު އެއްވެސް ފިޔަވަޅެއް އަޅާފައިވޭތޯ ސުވާލުކުރަން އެދިފައެވެ.

ވަގު ފޯމްތަކުގައި ހެކީންގެ ގޮތުގައި ސޮއިކޮށްފައިވާ މީހުންގެ ތެރޭގައި ޑީއެންއާރްގެ ވެރިޔާ، ހޯމް މިނިސްޓްރީގެ ޑެޕިއުޓީ މިނިސްޓަރު އަހްމަދު އަލީ އާއި ސްޓޭޓް މިނިސްޓަރު ހަސަން އަލީގެ އިތުރުން ސީނިއާ ޕޮލިޓިކަލް ޑިރެކްޓަރު ސޫދާ އަބްދުﷲ ހިމެނެ އެވެ.

ޕީއެންސީން މިއަދު ވަނީ ވަގު ފޯމްތައް އިލެކްޝަންސް ކޮމިޝަނަށް ހުށަހެޅިކަމަށް އެއްބަސްވެފަ އެވެ. އެ ޕާޓީގެ މަޖިލިސް މެމްބަރެއް ކަމަށްވާ މާފަންނު މެދު ދާއިރާގެ މެމްބަރު އަސްމާ ރަޝީދު ވިދާޅުވީ އެއީ އެ ޕާޓީގެ ތެރެއިން ކުރި ލަދުވެތި ދަށުދަރަޖައިގެ އަމަލެއް ކަމަށެވެ.