ހޮލީވުޑްގެ މަޝްހޫރު ފިލްމު ފްރެންޗައިޒް "އެވެޓާ"ގެ ތިންވަނަ ފިލްމު އޭގެ ކުރިން ނެރުނު ފިލްމުތަކަށްވުރެ ތަފާތުވާނެ ކަމަށް ފިލްމުގެ ޑިރެކްޓަރު ޖޭމްސް ކެމަރަން ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ޖޭމްސް ބުނީ މިއަހަރު ރިލީޒް ކުރަން ހަމަޖެހިފައިވާ އެވެޓާ 3އަކީ ބެލުންތެރިން ހީނުކުރާނެ ފަދަ ފިލްމެއް ކަމަށެވެ.

އެ ފިލްމުގައި ކުރީގެ ދެ ފިލްމަށްވުރެ މާބޮޑަށް ޝައުގުވެރި ކަންތައްތަކާއި ބެލުންތެރިން ހައިރާން ކޮށްލާނެ ކަންތައްތައް ފެނިގެންދާނެ ކަމަށް ޖޭމްސް ބުންޏެވެ. އެގޮތުން ފުރަތަމަ ދެ ފިލްމުގައި ބޭނުން ނުކުރާ އުކުޅުތައް ފިލްމުގެ މަންޒަރުތައް ނެގުމުގައި ވެސް ބޭނުން ކުރެވިފައިވާނެ ކަމަށް ވެސް ޖޭމްސް ފާހަގަކުރި އެވެ.

އެވެޓާގެ ފުރަތަމަ ފިލްމު 2009 ވަނަ އަހަރު ރިލީޒް ކުރެވުނުއިރު ދެވަނަ ބައި ރިލީޒްކުރީ އޭގެ 13 އަހަރު ފަހުން 2022ގަ އެވެ.

އެއަށްފަހު ތިންވަނަ ބައި ރިލީޒް ކުރަން ހަމަޖެހިފައިވަނީ މިއަހަރުގެ ޑިސެމްބަރު މަހުގެ 19 ވަނަ ދުވަހު ކަމަށް ހަބަރުތައް ބުނެ އެވެ.