އެންޓި ކޮރަޕްޝަން ކޮމިޝަން (އޭސީސީ)ން ތަހުގީގު ކުރާ މައްސަލައަކާ ގުޅިގެން ގދ. ތިނަދޫ ސިޓީ ކައުންސިލް އިދާރާއަށް އެ ކޮމިޝަނުން ވަނުމުން އެއީ ވަގުންގެ ގޮތުގައި ކައުންސިލުން ސިފަކޮށްފި އެވެ.

އޭސީސީން ބަލަމުންދާ މައްސަލަތަކުގައި ތިނަދޫ ކައުންސިލުން އެއްބާރުލުން ދެމުން ދަނިކޮށް، މޭޔަރު ސައުދު އަލީ ރަށުގައި ނެތް ވަގުތެއްގައި މައުލޫމާތު ސާފުކުރަން އޭސީސީގެ ނަމުގައި ތިން މީހަކު އައި ކަމަށާއި ނަމަވެސް އެމީހުން ބޭނުންވާ މާއުލޫމާތު އަނެއް ދުވަހުގެ މެންދުރު 2:30ގައި ހިއްސާކުރާނެ ކަމަށް އޭސީސީއަށް ލިޔުމުން އަންގާފައިވަނިކޮށް، ރަސްމީ ގަޑީގައި އޮފީހަށް ތިން މީހަކު ވަތް ކަމަށް ތިނަދޫ ސިޓީ ކައުންސިލުން ބުނެ އެވެ.

ނަމަވެސް ތިނަދޫ ސިޓީ ކައުންސިލުން ބުނީ ރަސްމީ ގަޑީގައި އޮފީހުގައި މުވައްޒަފުން ނެތް ވަގުތު ބަލައި، ލިޔެކިޔުންތައް ނަގައިގެން ފިލީ ކަމަށާއި އެއީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ފޮނުވައިގެން އޭސީސީގެ ނަމުގައި އައި ބަޔެއް ކަމަށް މޭޔަރު ސައުދު ތުހުމަތުކުރެއްވި އެވެ.

ސައުދު ވިދާޅުވީ އޭސީސީގެ ނަމުގައި އައި ތިން ކުދިން އޮފީހުން ނެރުމަށް ފުލުހުންނަށް ވެސް އިންފޯމްކޮށްފައިވާނެކަމަށާއި އެކަމަކު، ވެސް އޮފީހުން ނުނިކުމެ ތިބެފައި، އޮފީސް ކުދިން ނެތް ގަޑި ބަލާފައި އޮފީސް ތެރެ ލޫޓުވާލައިގެން ފިލީކަމަށް މޭޔަރު ވިދާޅުވި އެވެ.

ވައްކަމުގެ ތުހުމަތުކޮށް، އެ މައްސަލަ ފުލުހުންނަށް ހުށަހަޅާފައިވާ ކަމަށާއި މި ވަގުތު ކައުންސިލް އިދާރާގައި ފުލުހުން ހަރަކާތްތެރިވާތީ ކައުންސިލްގެ ގިނަ ޚިދުމަތްތަކެއް މެދުކެނޑިފައިވާ ކަން އޭނާ ފާހަގަކުރެއްވި އެވެ.

ތިނަދޫ ކައުންސިލުން ކުރި މި ތުހުމަތުތައް އެންޓި ކޮރަޕްޝަން ކޮމިޝަން (އޭސީސީ) އިން ވަނީ ދޮގުކޮށްފައެވެ. އޭސީސީން ބުނީ އެ ކޮމިޝަނާ ގުޅޭގޮތުން ފަތުރަމުންދ،ާ ހަގީގަތާ ހިލާފު މައުލޫމާތަކީބަލައިގަނެވޭނެ ކަމެއް ނޫންކަމާއި އަދި އެކަމާމެދު މި ކޮމިޝަނުން އިންތިހާއަށް ކަންބޮޑުވާކަން ފާހަގަކުރާކަމަށެވެ.

ކޮމިޝަނަށް ހުށަހެޅިފައިވާ މައްސަލަތަކާ ގުޅޭގޮތުން ތަހުގީގަށް ބޭނުންވާ ލިޔެކިޔުން ހޯދުމުގެ މަސައްކަތްވެސް ކުރިކަމަށްވެސް އޭސީސީން ބުންޏެވެ. އެކަމަކު އެއީ ކޮން މައްސަލައެއް ކަމެއް އޭސީސީން ނުބުނެ އެވެ.

އޭސީސީން ބުނީ އެކަމުގައި ކައުންސިލްގެ ފުރިހަމަ އެއްބާރުލުން ލިބިފައިނުވާ ކަމަށެވެ. ނަމަވެސް ކޮމިޝަނުގެ ގާނޫނީ އިމުގެ ތެރެއިން އެންމެހާ އިޖުރާއަތްތައް ފުރިހަމަ ކުރުމަށްފަހު ތަހުގީގަށް ބޭނުންވާ ލިޔެކިޔުން ހޯދާފައިވާ ކަމަށް ބުންޏެވެ.

ތިނަދޫ ކައުންސިލުގެ ގިނަ މައްސަލަތަކެއް އޭސީސީން ދަނީ ބަލަމުންނެވެ.