ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހައުސިން މިނިސްޓްރީގެ ސްޓޭޓް މިނިސްޓަރުކަން ކުރެއްވި އަކްރަމް ކަމާލުއްދީންގެ ޕާސްޕޯޓު ހިފަހައްޓަން ކްރިމިނަލް ކޯޓުން ނެރުނު އަމުރު ހައި ކޯޓުގައި އިސްތިއުނާފުކޮށްފި އެވެ.

ކުރީގެ ސަރުކާރުން ހިންގި "ބިންވެރިޔާ" ސްކީމާއި "ގެދޮރުވެރިޔާ" ސްކީމްގެ ތެރެއިން ކޮރަޕްޝަނަށް މަގުފަހިވާގޮތަށް އަމަލުކޮށްފައިވާ ކަމަށް ބުނާ މައްސަލައެއްގައި އެންމެ ފުރަތަމަ އަކްރަމްގެ ޕާސްޕޯޓް ހިފެހެއްޓީ 20 ޑިސެމްބަރުން ފެށިގެން 1 މަސްދުވަހުގެ މުއްދަތަކަށެވެ. އޭގެ ފަހުން މި މަހު 19 ވަނަ ދުވަހު ކްރިމިނަލް ކޯޓުން ވަނީ އަންނަ މަހު 18 ވަނަ ދުވަހުގެ ނިޔަލަށް އޭނާ ފުރުން މަނާކޮށް ޕާސްޕޯޓް ހިފެހެއްޓުމުގެ އަމުރެއް ނެރެފައި އެވެ.

ހައި ކޯޓުގައި އިސްތިއުނާފް ކުރީ، އަކްރަމްގެ ޕާސްޕޯޓް ހިފަހައްޓަން ކްރިމިނަލް ކޯޓުން އެންމެ ފަހުން ނެރުނު އަމުރެވެ.

ބޭރަށް ދިއުމުގެ ގާބިލްކަމަކީ ހެއްކެއް ކަމަށް ބުނެ އަކްރަމް ފިލައިގެން ދާން އުޅޭ ކަމުގެ ހެއްކަކަށް އެންޓި ކޮރަޕްޝަން ކޮމިޝަން (އޭސީސީ)ން ހުށަހެޅީ އޭނާގެ ބޭންކް ސްޓޭޓްމަންޓްތަކާއި ރާއްޖޭން ބޭރަށް ކޮށްފައިވާ ދަތުރުތަކުގެ ތަފްސީލެވެ.

އަކްރަމްގެ ފަރާތުން ހައި ކޯޓަށް ހުށަހަޅާފައިވާ އިސްތިއުނާފީ ނުކުތާއަކީ އެއީ ތަހުގީގަށް އެއްބާރުލުން ނުދީ، އޭނާ ރާއްޖޭން ބޭރަށް ފިލައިގެން ދާން އުޅޭ ކަން ސާބިތުވާނެ ހެއްކެއް ނޫން ކަމަށެވެ.

މައްސަލައިގެ ތަހުގީގަށް އެއް އަހަރު ވެގެންދާއިރު، އޭނާގެ މައްޗަށް ކުރެވޭ ތުހުމަތަށް ބާރުދޭ އެކަށީގެންވާ ހެކި ނެތް ކަމަށް އަދި ޕާސްޕޯޓް ހިފަހައްޓަން އެދުނު އިރު ވެސް އިތުރު އާ ހެކި ގަރީނާ ޝަރީއަތަށް ހުށަނާޅާ ކަމަށް އަކްރަމްގެ ފަރާތުން ފާހަގަކޮށްފައިވެ އެވެ.

މި މައްސަލަ ހައި ކޯޓުން ބަލައިގަތުމާ މެދު ގޮތެއް ނިންމި ކަމެއް އަދި ނޭނގެ އެވެ.

އޭސީސީން ތަހުގީގު ކުރަމުން އަންނަ މައްސަލާގައި އަކްރަމްގެ އިތުރުން ކުރީގެ ސަރުކާރުގެ ހައުސިން މިނިސްޓްރީގެ ބައެއް ވެރިންގެ ޕާސްޕޯޓު ހިފަހައްޓާފައިވެ އެވެ. އޭގެތެރޭގައި ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް އާއި ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު އަދި މި ސަރުކާރުގައި ވެސް ޑިރެކްޓަރު ޖެނެރަލްގެ މަގާމުގައި ހުންނެވި އަހުމަދު ވިޝާން ނަސީމް ހިމެނެ އެވެ.