އިންޑިއާގެ ހިންދޫ ދީނުގެ އަޅުކަމެއްގައި ބައިވެރިވުމަށް އެއްވި ގިނަ އަދަދެއްގެ ބަޔަކު ފިތި ބާރުވެގެން 12 އަށް ވުރެ ގިނަ މީހުން މަރުވެއްޖެ އެވެ.

އުތުރު އިންޑިޔާގައި މިއަދު ހެނދުނު ހިނގި މި ހާދިސާގައި ފިތި ބާރުވުމުގެ ސަބަބުން މަރުވި މީހުންގެ އަދަދާއި ސިއްހީ ފަރުވާއަށް ގެންގޮސްފައިވާ މީހުންގެ އަދަދު އެގައުމުގެ އެއްވެސް ރަސްމީ އިދާރާއަކުން ކަށަވަރުކޮށް ނުދެ އެވެ.

ނަމަވެސް ބައެއް މީޑިއާތައް ރިޕޯޓްކޮށްފައިވާ ގޮތުގައި ކޯރު ކައިރީގައި މީހުން ތޮއްޖެހި، މީހުންގެ ތަބަސްތަކާއި މުދާތަކުން މުޅި ސަރަހައްދު ވަނީ ފުރިފަ އެވެ. ފިތިގެން ތާށިވި މީހުން ސަލާމަތް ކުރުމަށް ހާއްސަ ޓީމެއް ދަނީ މަސައްކަތް ކުރަމުންނެވެ.

ގިނަ އަދަދެއްގެ މީހުންނަށް ޚިދުމަތް ދިނުމަށްޓަކައި އިދާރާތަކުން ގިނަ ފިޔަވަޅުތަކެއް އަޅާފައިވާ ކަމަށް ވަނީ ބުނެފަ އެވެ. މީގެ ތެރޭގައި ސެކިއުރިޓީއާއި މެޑިކަލް މުވައްޒަފުން އިތުރުކުރުމާއި، އިތުރު ދަތުރުފަތުރަށް ބަހާއި ރޭލު ވަނީ ހަމަޖައްސާފަ އެވެ.މީހުން ބެލެހެއްޓުމަށް އޭ.އައި ސޮފްޓްވެއާއެއްވެސް ބޭނުންކުރެވުނުކަމަށް އެކަން އިންތިޒާމުކުރާ ފަރާތުން ބުނެފައިވެ އެވެ.

2013 ވަނަ އަހަރުވެސް އިންޑިއާގައި މިފަދަ އެއްވުމެއްގައި ފިތިގެން 36 މީހަކު މަރުވެފައިވެ އެވެ. އޭގެ ތެރާގައި ގިނައީ އަންހެނުންނެވެ.

އިންޑިއާގެ އޮފިޝަލުން ލަފާކުރާ ގޮތުގައި އިންޑިއާގެ ހިންދޫ ދީނުގެ މި މުނާސަބަތުގައި 100 މިލިއަނަށްވުރެ ގިނަ މީހުން އެސަރަހައްދަށް ޖަމާވާނެ އެވެ.