އާބާދީގައި ކިރިޔާ 400 މީހުން ހަމަވާ ހއ. މޮޅަދޫ ވެސް އެންމެ ބޮޑެތި އާބާދީތަކާ އެއްވަރަށް ތަރައްްގީކޮށްދޭނެކަމުގެ ޔަގީންކަން ރައީސް މުހައްމަދު މުއިއްޒު މިއަދު ދެއްވައިފި އެވެ.

ބޮޑު ވަފުދަކާއެކު ހއ. އަތޮޅުގެ ދިހަ ރަށަކަށް ކުރައްވާ ރަސްމީ ދަތުރުފުޅުގައި، 412 މީހުންގެ އާބާދީއެއް އޮންނަ މޮޅަދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ މޮޅަދޫގެ އާބާދި ކުޑަނަމަވެސް، އެންމެ ބޮޑު އާބާދީތަކުގެ ރައްޔިތުންނާ ހަމަހަމަ ކަމަށެވެ. އަދި އެ ރައްޔިތުންނަށް ވެސް ހުރިހާ ހައްގުތަކާއި ޚިދުމަތްތައް މުހިންމު ކަމަށް ވިދާޅުވަމުން ރައީސް ވަނީ މޮޅަދޫގެ ރައްޔިތުން އުންމީދުކުރާ ގޮތަށް ވަރަށް އިސްކަންދީގެން ބާރު ސްޕީޑުގައި ކަންކަން ކުރުމަކީ ސަރުކާރުގެ ސިޔާސަތު ކަމަށް ވިދާޅުވި އެވެ.

މޮޅަދޫގައި ހުއްޓިފައި ހުއްޓި ބައެއް މަސައްކަތްތަކާ ބެހޭ ގޮތުން ވާހަކަދައްކަވަމުން ރައީސް ވިދާޅުވީ ފެނާއި ނަރުދަމާގެ މަޝްރޫއު އަވަސްކޮށް ނިންމައިދެއްވާނެ ކަމަށެވެ.

މޮޅަދޫގައި ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތް ފަށާފައިވަނީ 2021 ވަނަ އަހަރު އެވެ. ނަމަވެސް، އެ މަސައްކަތް މިހާތަނަށް އޮތީ މަޑުޖެހިފަ އެވެ. ރައީސް ވަނީ ހުއްޓިފައިވާ މަޝްރޫޢުތައް ކުރިއަށް ގެންދެވޭނެ ގޮތްތަކެއް ހޯދިފައިވާކަން ފާހަގަކުރައްވާފަ އެވެ.

"ހުއްޓިފައި މިއޮތް ފެނާ ނަރުދަމާ އަޅުގަނޑު މި ނިންމި ގޮތަށް އަލުން ފަށައި، ތިބޭފުޅުންނަށް ބާރު ސްޕީޑުގައި ހިންގައި ނިންމާދޭނެކަމުގެ ޔަޤީންކަން ދެން. ހަމަމިއާއެކު މިރަށަކީ އިގްތިސޯދީ ނަޒަރަކު ބިޔަ ހިތްފަސޭހަ ރަށެއް. ލޯކަލް ޓޫރިޒަމަށް ފީސިބަލް ރަށެއް،" ރައީސް މުއިއްޒު ވިދާޅުވި އެވެ.

ރައީސް ވިދާޅުވީ ވިދާޅުވީ ފުރަތަމަ އިސްކަންދެއްވަނީ ފެނާ ނަރުދަމާ ނިންމައި ރައްޔިތުންނަށް ޚިދުމަތް ދިނުމަށް ކަމަށެވެ. އަދި އެއަށްފަހު ލޯކަލް ޓޫރިޒަމް ސަރަހައްދަށް އެ ޚިދުމަތް ފުޅާކޮށްދޭނެ ކަމަށް އެމަނިކުފާނު ވިދާޅުވި އެވެ.

ރައީސް މުއިއްޒު މޮޅަދުއަށް ވަޑައިގެންނެވިއިރު މޮޅަދު ސްކޫލުގެ އާ އިމާރާތުގެ މަސައްކަތް 2021 ވަނަ އަހަރު ފެށުނު ނަމަވެސް އެ މަސައްކަތް ވެސް އޮތީ މަޑުޖެހިފަ އެވެ. އަދި ބޭރުގެ ފަންޑުން 21 ރަށެއްގެ ކުނި މެނޭޖުކުރުމަށް އެޑްވާންސް ފައިސާ ދީ، އެކަން ހުއްޓިފައި އޮތްކަން ވެސް އެމަނިކުފާނު ފާހަގަކުރެއްވި އެވެ.