މުޖުތަމައުގައި "ފަލަ ބަލި" ބޭނުން ކުރެވެނީީ އުމުރާއި އިސްކޮޅުގެ ނިސްބަތުން ބަރުދަން ހުންނަންވާ މިންވަރަށްވުރެ އިތުރުކޮށް ބަރުދަން ހުންނަ މީހުންނަށެވެ. އިނގިރޭސި ބަހުންނަމަ އެއީ އޮބޭސިޓީ އެވެ.

އާއްމު ގޮތެއްގައި "ފަލަބަލި"އޭ ބުނުމުން ސިފަވަނީ މިނަށްވުރެ ބަރުދަން އިތުރު ގިނަ ސިއްހީ މައްސަލަތަކެއް ތަހައްމަލުކުރާ "ބަލި" މީހުންނެވެ.

އެހެން ނަމަވެސް އުފެދޭ ސުވާލަކީ ފަލަބަލިއޭ ކިޔޭ ހާލަތަކީ ހަގީގަތުގައި ވެސް ބައްޔެއްތޯ އުފެދޭ ސުވާލެވެ. އެ ސުވާލަށް ސިއްހީ މާހިރުން މިވަނީ ޖަވާބު ދީފަ އެވެ.

ލަންސެޓް ޑައިބެޓީސް އެންޑް އެންޑްކްރިނޮލޮޖީ ޖާނަލްގައި ޝާއިއު ކޮށްފައިވާ ދިރާސާ ލިޔުމެއްގައި ބުނެފައިވަނީ ފަލަބަލި ނުވަތަ އޮބޭސިޓީއަކީ ހުރިހާ ހާލަތްތަކުގައި ބައްޔެއްގެ ގޮތުގައި ނުބެލެވޭނެ ކަމަށެވެ.

ސަބަބެއްގެ ގޮތުގައި އެ ދިރާސާގައި ހަރަކާތްތެރިވި މާހިރުން ވިދާޅުވެފައިވަނީ ފަލަބަލި ތަހައްމަލު ކުރާ މީހުންގެ ކިބައިން އާއްމު ގޮތެއްގައި ހަކުރު ބައްޔާއި ހިތުގެ ބަލި އަދި ބައެއް ކެންސަރުތައް ފެނުނު ނަމަވެސް އެއިން އެއްވެސް ކަމެއް ތަހައްމަލު ނުކުރާ، ސިއްހަތު ރަނގަޅު ފަލަ މީހުން ވެސް ދުނިޔޭގައި ގިނަ އަދަދަކަށް އުޅޭ ކަމެވެ.

އެފަދަ މީހުންނަކީ "ޕްރީ ކްލިނިކަލް އިލްނެސް" ތަހައްމަލުކުރާ މީހުން ކަމަށާއި އެ މީހުންނަށް ދިގު މުއްދަތުގެ ބަލިތައް ޖެހުމުގެ ފުރުސަތު ބޮޑު ކަމަށް އެ ދިރާސާގައި ބުނެފައިވެ އެވެ.

އެހެން ކަމުން ފަލަބަލި ހުންނަ ހުރިހާ އެންމެންނަކީ ހަގީގަތުގައި "ބަލި" ބައެއް ނޫންކަން މާހިރުންގެ މި ދިރާސާއިން ވަނީ ހާމަވެފަ އެވެ.