މާލޭ ސަރަހައްދުގައި ވަކި ވަގުތުތަކެއްގައި އެއްގަމު އުޅަނދު ދުއްވުން މަނާކުރުމަށް އެންގި އެންގުން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބާތިލުކޮށްފި އެވެ.

ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ ނެރެފައިވާ އެންގުމުގައި ވަނީ މާލޭ ސަރަހައްދުގައި މިހާރު އަމަލުކުރަމުންދާ ރައްކާތެރިކަމުގެ ބައެއް ފިޔަވަޅުތަކަށް ބަދަލު ގެނެސް، ރައްކާތެރިކަމުގެ ފިޔަވަޅުތަކުގެ މުއްދަތު އިތުރު އެއް ހަފްތާއަށް އިތުރުކޮށްފަ އެވެ.

މީގެ ތިން ހަފުތާއެއްހާ ދުވަސް ކުރިން އެ އިދާރާ އިން ވަނީ މާލެ ސަރަހައްދުގައި ހަވީރު 6 އިން ފަތިހު 6 އަށް ވެހިކަލް ދުއްވުން މަނާކޮށްފަ އެވެ.

ނަމަވެސް އެޗްޕީއޭގެ ޑިރެކްޓަ ޖެނެރަލް މައިމޫނާ އަބޫބަކުރު ސޮއިކުރައްވައި ނެރުއްވި އިއުލާނެއްގައިވާ ގޮތުން، ހަވީރު 6 އިން ފަތިހު 6 އަށް މާލެެ ސަރަހައްދުގައި އެއްގަމު އުޅަނދު ދުއްވުން މަނާ ކުރުމުގެ އަމުރު ރެއިން ފެށިގެން ވަނީ އުވާލައިފަ އެވެ. އެހެންވެ، އެއްވެސް ވަގުތަކު އެއްގަމު އުޅަނދު ދުއްވުން މިހާރު މަނައެއް ނުވާނެ އެވެ. އެކަމަކު، ރޭގަނޑު 11 ގެ ފަހުން އިއުލާންކޮށްފައި އޮންނަ ކާފިއުގެ ހާލަތު އަދިވެސް ދެމިއޮންނާނެ އެވެ. އެހެންވެ، މާލެ ސަރަހައްދުގައި ފަތިސް ވަންދެން ބޭރަށް ނުކުމެ އުޅުން މަނާވާތީ، ވެހިކަލް ދުއްވުން ވެސް އެ ގަޑީގައި މަނާވާނެ އެވެ.

އިތުރު 7 ދުވަހުގެ މުއްދަތަށް އެޅުމަށް ނިންމާފައިވާ ފިޔަވަޅުތަކަކީ

  1. ރޭގަނޑު 11:00 އިން ފެށިގެން ފަތިހު 4:30 އަށް، މަގުމައްޗާއި އާންމު ތަންތަނަށް މީހުން ނުކުތުން މަނާކުރުން
  2. އެއްފަހަރާ 5 މީހުންނަށްވުރެ ގިނަމީހުން، މަގުމައްޗާއި އާންމު ތަންތަނަށް އެއްވެއުޅުން ހުއްޓައިލުން
  3. ސިނަމާތަކާއި ފިލްމު ތިއޭޓަރުތައް ހިންގުން ހުއްޓައިލުން- ދުވުމަށް ޚާއްޞަ ކޮށްފައިވާ ޓްރެކުތައް ބަންދުކުރުން
  4. ޔުނިވަސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދިޔުން ހުއްޓައިލުން
  5. އެކަނި ކުރާ ކަސްރަތުތައް ފިޔަވައި، ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހުއްޓައިލުން

މީގެ އިތުރުން ޖިމްތަކުގައި، ހަމައެކަނި، އެކަނި ކުރާ ކަސްރަތުތައް ކުރުމަށް ހަމަޖެއްސުމަށާއި، ޚާއްޞަ ހުއްދައިގެ ދަށުން ޒަރޫރީ ބޭނުންތަކަށް މާލެ ސަރަޙައްދުން ރަށްރަށަށް ދާ ފަރާތްތަކުން ދަތުރުކުރުމުގެ 72 ގަޑިއިރުގެ ތެރޭގައި ހަދާފައިވާ ނެގެޓިވް ޕީސީއާރު ޓެސްޓެއް އޮތުމާއި، ޕްރީ ސްކޫލުތަކާއި، ނާސަރީތަކުގައި ކިޔަވައިދިނުން ހުއްޓާލުމުގެ އިތުރުން ޑޭ ކެއަރގެ ޚިދުމަތް ދޭ ތަންތަނުން ދެމުންގެންދާ ޚިދުމަތްތައް ދިނުން ހުއްޓާލުމަށް މިމަހުގެ ހަތަރުވަނަ ދުވަހު އެންގި އެންގުން ވެސް މިއަދުން ފެށިގެން އިތުރު ހަތް ދުވަހަށް ވަނީ ދަމަހައްޓާފަ އެވެ.

އެޗްޕީއޭއިން ބުނީ ސިފައިންނާއި ފުލުހުން އަދި ސިއްހީ ޚިދުމަތް ދޭ އިދާރާތަކުގެ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރާއި އެމްބިއުލަންސާއި ހެލްތު އިމަޖެންސީ އޮޕަރޭޝަން ސެންޓަރުގެ ފާސް ލިބިފައިވާ ފަރާތްތަކުގެ އިތުރުން ފަތިސް ނަމާދަށް މިސްކިތަށް ދާ ފަރާތްތަކާއި، އިމަޖެންސީކޮށް ޞިއްޙީ ޚިދުމަތް ހޯދާންޖެހޭ ފަރާތްތައް އެ ފިޔަވަޅުތަކުން އިސްތިސްނާވާނެ ކަމަށެވެ.

މާލެ ސަރަހައްދުގައި ކާފިއު އިއުލާންކުރީ، ތިންވަނަ ރާޅަކާއެކު ކޮވިޑް 19 އަށް ޕޮޒިޓިވް ވާ މީހުންގެ އަދަދު ވަރަށް ބޮޑަށް އިތުރުވުމާ ގުޅިގެންނެވެ. އެއާއެކު ރާއްޖެއިން ކޮވިޑަށް ޕޮޒިޓިވްވާ އަދަދު 100ން މަތީގައި އުޅޭތާ މިހާރު މަހަކަށް ވުރެ ގިނަ ދުވަސްވަނީ ވެފަ އެވެ.

މީގެ ތިން ދުވަސް ކުރިން ކެފޭތަކުގެ އެތެރޭގައި ކެއިން ބުއިމުގެ ހިދުމަތް ދޭ ވަގުތު ވެސް ވަނީ އެޗްޕީއޭ އިން ވަނީ އިތުރުކޮށްފަ އެވެ. ކުރިން ރޭގަނޑު 8 އާ ހަމައަށް ކެފޭތަކުން ޑައިން އިން ގެ ހިދުމަތް ހުއްޓާލަން އޮތް ނަމަވެސް އެ ވަގުތު މިހާރު ވަނީ 10:30 އަށް ދަންމާލައިފަ އެވެ.

މާލެ ސަރައްދުގައި އަޅާފައިވާ ފިޔަވަޅުތަކަށް އެމްޑީޕީގެ ރައީސް މުހައްމަދު ނަޝީދާއި މަޖްލިސް ބައެއް މެމްބަރުން ދަނީ ލޯކަލް ކައުންސިލް އިންތިހާބުގެ ވޯޓާ ދިމާކޮށް އެޗްޕީއޭއަށް ވަރަށް ބޮޑަށް ފާޑު ކިޔަމުންނެވެ.