އާ ޑައިޓެއް ނުވަތަ ކަސްރަތު ރޫޓިންއެއް ފެށުމަށްފަހު އޭގެ ނަތީޖާ ދުވަހުން ދުވަހަށް ފެންނަން ގިނަ ބަޔަކު ބޭނުންވެ އެވެ. އެއީ ބަރުދަން ލުއި ކުރަން ކަމުގައި ވިޔަސް ނުވަތަ ހަށިގަނޑު ވަރުގަދަ ކުރަން ކަމުގައި ވިޔަސް ޑައިޓް ފަށާތާ މާ ގިނަ ދުވަހެއް ނުވެ ކައްޓާއަށް އެރެ އެވެ. ނުވަތަ ލޯގަނޑު ކުރިމައްޗަށް އަރައި ބަދަލެއް އައިސްފައިވޭޭތޯ ބެލެ އެވެ.

"ނަތީޖާ ފެނުން ބިނާވެފައި އޮންނާނީ އެމީހަކު ކުރާ ކަސްރަތެއްގެ ބާވަތާއި އެ ކުރާ ގޮތާއި މެދުނުކެނޑި ކަސްރަތު ކުރުމަށް" ނެބްރަސްކާގެ ޑައިޓީޝަނެއް ކަމަށްވާ އޭންޖީ އެލްސް ވިދާޅުވި އެވެ.

ފްލޮރިޑާގައި މަސައްކަތްކުރާ ސެޓިފައިޑް ޕާސަނަލް ޓްރެއިނަރެއް ކަމަށްވާ ޓީނާ ފެނެލީ ވިދާޅުވީ ކަސްރަތު ނުވަތަ ޑައިޓުގެ ނަތީޖާ ފެނުމަށް ތަފާތު ކަންތައްތައް އަސަރުކުރާ ކަމަށެވެ.

ހަރަކާތްތެރި ކަސްރަތުތައް ކުރުމަކީ ނަތީޖާ ފެނުން އަވަސްވާ ކަމެއް

އެގޮތުން މިހާގެ އުމުރާއި ޖިންސުގެ އިތުރުން މެޓަބޮލިޒަމްއަކީ ވެސް ކަސްރަތާއި ޑައިޓުގެ ނަތީޖާ ފެނުން އަވަސް ނުވަތަ ލަސްކޮށްދޭ ކަމެއް ކަމަށް އޭނާ ފާހަގަކުރި އެވެ.

"މިސާލަކަށް އަންހެނުންނާ އަޅާބަލާއިރު ފިރިހެނުންގެ މެޓަބޮލިކް ރޭޓް ތަންކޮޅެއް މަތިވާނެ. ފިރިހެނުން ތަންކޮޅެއް ހަށިގަނޑު ވަރުގަދަކޮށް ތިބެނީ އެހެންވެ." ޓީނާ ވިދާޅުވި އެވެ.

ޓީނާ އިތުރަށް ވިދާޅުވީ ކެއިންބުއިމާއި ދިރިއުޅުމުގެ ވައްޓަފާޅިއަށް ގެންނަ ބަދަލުތަކުގެ ނަތީޖާ ފެންނަން ގާތްގަނޑަކަށް 8-6 ހަފްތާގެ މުއްދަތެއް ނަގާނެ ކަމަށެވެ.

ނަތީޖާ ހޯދަން ކެތްމަދުވެފައިވާ މީހަކަށް އެއީ ދިގު މުއްދަތެއް ކަމަށް ހީވިޔަސް ހަގީގަތުގައި އެއީ ދިގު މުއްދަތެއް ނޫނެވެ. ހަށިގަނޑު އާދަވެފައިވާ ކަންކަމުން ދުރުވެ އާ ވައްޓަފާޅިއަކަށް ހޭނުމަކީ ވަގުތު ނަގާނެ ކަމެކެވެ.

ކެއުމުގައި ގިނައިން ފައިބާޔ ހިމަނާނަމަ ނަތީޖާ ފެނުން އަވަސްވޭ

ނަތީޖާ ފެންނަން ފަށާއިރު ވެސް ވިސްނަންޖެހޭ ކަމަކީ އެއްފަހަރުން ނަތީޖާ ނުފެނިދާނެ ކަމެކެވެ. ބައެއް މީހުންނަށް ކުޑަ ދުވަސްކޮޅެއްގެ ތެރޭގައި އެކަން ހާސިލުވާއިރު ބައެއް މީހުން އެކަމަށް އަހަރުތަކެއް ވެސް ހޭދަކުރަން ޖެހެ އެވެ.

އެގޮތުން އެންމެ ފުރަތަމަ ހަށިގަނޑަށް އަންނަ ބަދަލުތައް ފާހަގަ ކުރެވޭނީ އަމިއްލަ މީހާއަށް އެކަންޏެވެ. އެއަށްފަހު އެކުގައި އުޅޭ ގާތް ތިމާގެ މީހުންނަށް ފާހަގަވާން ފަށާއިރު ދުރުހިލޭ މީހުންނަށް ތިބާގެ ހަށިގަނޑު ބަދަލުވާކަން ފާހަގަވާނީ ވަރަށް ދުވަހުންނެވެ.

އެހެން ކަމުން މިކަމުގައި އެންމެ މުހިއްމު ކަމަކީ އާ ޑައިޓެއް ނުވަތަ ވޯކްއައުޓްއެއް ފެށުމަށްފަހު އެކަމުގައި ދެމިހުރުމެވެ. ނަތީޖާ ނުފެންނާތީ ހިތްވަރު އެލުވާނުލައި ކުރިއަށް ދިއުމެވެ. އެގޮތުގެ މަތިން ގިނަ ދުވަހުން ވިޔަސް ލިބޭ ނަތީޖާ ފޮނިވާނެ އެވެ.