ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް ހަދާ ސައުދީ ބިންލާދިން ގްރޫޕްގެ މުވައްޒަފުންނާއި އެތަނުގައި ސަބް ކޮންޓްރެކްޓަރެއްގެ ގޮތުގައި މަސައްކަތް ކުރާ ޗައިނާގެ ޗައިނާ ކޮމިއުނިކޭޝަން ކޮންޓްރަކްޝަން ކޮމްޕެނީ (ސީސީސީސީ) މުވައްޒަފުންގެ މެދުގައި ބޮޑު ހަމަނުޖެހުމެއް ހިންގައި އެތައް ބަޔަކަށް ފަރުވާދޭން ހޮސްޕިޓަލަށް ގެންގޮސްފި އެވެ.

"ހުރިހާ"އަށް އެނގިފައިވާ ގޮތުގައި މިއަދު ހަވީރު ހިނގި މި ހަމަނުޖެހުމުގައި އެތަނުގައި މަސައްކަތްކުރާ ގިނަ އަދަދެއްގެ މީހުންނަށް އެކިވަރުގެ އަނިޔާ ލިބިގެން ހުޅުމާލެ ހޮސްޕިޓަލަށާއި ޓްރީ ޓޮޕް ހޮސްޕިޓަލަށް ގެންދިޔަ އެވެ. މީގެ ތެރޭގައި އެތަނުގައި މަސައްކަތްކުރުވަން ތިބޭ އެ ދެ ކުންފުނީގެ އިސްވެރިންތަކެއް ވެސް ހިމެނެ އެވެ.

މި މާރާމާރީގައި ބައެއް މީހުން ބޯފެޅި، އެކިވަރުގެ ޒަޚަމްތައް ލިބިގެން ހޮސްޕިޓަލަށް ގެންދިޔަ ކަމަށް އެނގިފައިވެ އެވެ. އެ ހާދިސާ ހިނގަން މެދުވެރިވީ ވީއައިއޭގެ އާ ޓާމިނަލްގެ މަސައްކަތް ކުރަމުންދާ ކުންފުނީގެ މުވައްޒަފުންގެ މެދުގައި ޖެހުނު މައްސަލައަކާ ގުޅިގެން ކަމަށް ފުލުހުން ބުންޏެވެ.

ފުލުހުން ބުނީ އެ މާރާމާރީގައި ތިން ބިދޭސީއަކަށް އަނިޔާވި ކަމަށެވެ. އޭގެތެރޭގައި ހިމެނެނީ މިސްރުގެ ދެ މީހަކާއި ބަންގްލަދޭޝްގެ މީހެކެވެ. އެއިން އެއްވެސް މީހެއްގެ ހާލު ސީރިއަސް ނޫން ކަމަށް ފުލުހުން ބުންޏެވެ.

މި ހާދިސާއާ ގުޅޭ އިތުރު މައުލޫމާތެއް ފުލުހުން ނުދެ އެވެ.

މި ހަމަނުޖެހުން ހިނގަން މެދުވެރި ސަބަަބެއް ފުލުހުން އަދި އެމްއޭސީއެލް އިން ވެސް ނުބުނެ އެވެ.