އެއްވެސް އިރެއްގައި ހަށިގަނޑު ރީތިކުރަން ޕްލާސްޓިކް ސާޖަރީ ހަދާފައި ނުވާނެ ކަމަށް ބޮލީވުޑްގެ މަޝްހޫރު އެކްޓަރު ކަރީނާ ކަޕޫރު ޚާން ބުނެފި އެވެ.

ދާދި ފަހުން މުމްބާއީގައި އޮތް އިވެންޓެއްގައި ވާހަކަ ދައްކަމުން ކަރީނާ ވަނީ އޭނާގެ ކެރިއަރުގައި ޕްލާސްޓިކް ސާޖަރީ ނުހަދަން ނިންމީ ކީއްވެކަން ބުނެދީފަ އެވެ.

ކަރީނާ ބުނީ އުމުރުން ދުވަސްވުމާއި ހަށިގަނޑަށް އަންނަ ބަދަލުތަކަކީ ދިރިއުޅުމުގެ ބައެއް ކަމަށް އޭނާ ގަބޫލުކުރާ ކަމަށާއި އެހެން ކަމުން އެކަން ބަދަލު ކުރަން ބޮޓޮކްސް ހަދަން ބޭނުންނުވާ ކަމަށެވެ.

އެހެން ނަމަވެސް ހަށިގަނޑު ރީތިކޮށް ބެހެއްޓުމަށްޓަކައި އޭނާ އަމިއްލައަށް ކުރެވޭ ގުދުރަތީ ފަރުވާތަކުގެ ބޭނުންކުރާ ކަމަށް ކަރީނާ އެއްބަސްވެފައިވެ އެވެ.

"އަހަރެން މި އަންނަނީ ބޮޓޮކްސް ހެދުމުގެ ބަދަލުގައި އަމިއްލައަށް ކުރެވެން ހުރި ސިއްހީ ގޮތުން ފައިދާހުރި ކަންތައްތައް ކުރަމުން" ކަރީނާ ބުންޏެވެ.

މިފަހަކަށް އައިސް ބޮލީވުޑްގައި ބޮޓޮކްސް ފަދަ ޕްލާސްޓިކް ސާޖަރީތައް ހެދުމަކީ ވަރަށް އާއްމު ކަމަކަށް ވަނީ ވެފަ އެވެ. އެގޮތުން ދުވަސްވީ އެކްޓަރުންނާއި ޒުވާން އެކްޓަރުން ވެސް އެކަން ކުރެ އެވެ.

ކަރީނާގެ ފިލްމީ މަސައްކަތްތަކަށް ބަލާލާއިރު އޭނާ އެންމެ ފަހުން ފެނިފައިވަނީ މިދިޔަ އަހަރު ރިލީޒްކުރި "ދަ ކްރޫ"، "ބަކިންހަމް މާޑާސް" އަދި "ސިންގަމް އަގެއިން" އިންނެވެ.