އާއްމު ދިރިއުޅުމުގައި ކާބޯތަކެތި ތައްޔާރު ކުރުމުގައި ގިނަ ވަގުތުތަކެއް ހޭދަވެ އެވެ. ކެއްކުމާއި އެކަމާ ގުޅުންހުރި ކަންކަމުގައި އާއްމުކޮށް އުޅެނީ އަންހެނުން އެކަންޏެވެ.

އެހެން ނަމަވެސް ދިރާސާތަކުން ދައްކާ ގޮތުގައި ކެއްކުމުގައި އާއިލާގެ އެހެން މެމްބަރުން ވެސް ބައިވެރިވުމަކީ ގިނަ ފައިދާތައް ލިބޭ ކަމެކެވެ. ހާއްސަކޮށް ކުޑަކުދިންނެވެ.

މާހިރުން ވިދާޅުވާ ގޮތުގައި ގޭގެ ކެއްކުމުގައި ކުޑަކުދިން ބައިވެރި ކުރުމަކީ ސިއްހީ ގޮތުންނާއި އެނޫންވެސް ގޮތްގޮތުން އެ ކުދިންނަށް ފައިދާހުރި ކަމެކެވެ.

ކެއްކުމުގައި ކުޑަ ކުދިން ބައިވެރި ކުރުމުން ދުޅަހެޔޮ ކެއުމަށް ކުޑަކުދިންގެ ހިތްޖެހި ކެއިންބުއިމުގެ ރަނގަޅު އާދަތަކަށް ހޭލުންތެރިވެ އެވެ.

މީގެ އިތުރުން ވެސް އާއްމު ދިރިއުޅުމުގެ ހުނަރުތައް ލިބުމާއި ނަފްސާނީ ދުޅަހެޔޮކަން އިތުރުވުމަކީ ވެސް މިކަމުގެ ފައިދާތަކުގެ ތެރޭގައި ހިމެނޭ ކަންކަމެވެ.

އެގޮތުން ކުދިކުދި ކަންކަމުން ކާމިޔާބީގެ އިހުސާސް ކުރެވުމާއި ހިސާބު ފަދަ ދިރިއުޅުމަށް ބޭނުންވާ އެންމެ އާއްމު ހުނަރުތައް ވެސް ކުދިންގެ ކިބައިގައި އަށަގަނެ އެވެ.

ކުޑަކުދިން ކެއްކުމުގައި ބައިވެރި ކުރުމަށްޓަކައި އުނދަގޫ ކަންތައްތަކެއް ޖައްސާކަށް ނުޖެހެ އެވެ. ބަދިގެ ތެރޭގައި ކުރަންޖެހޭ ކިތަންމެ ކުޑަ ކަމަކުން ވެސް ކުޑަކުދިންނަށް މި ފައިދާތައް ލިބޭނެ އެވެ.