މީގެ ގާތްގަނޑަކަށް 85 ވަރަކަށް އަހަރު ކުރިން "ނާޒީން" ވަަގަށް ނަގާފައިވާ 17 ވަނަ ގަރުނުގެ ކުރެހުމެއް އެ ކުރެހުމުގެ ވެރިޔާގެ އާއިލާއަށް ދޭން އިނގިރޭސި ވިލާތުން ނިންމައިފި އެވެ.

ބެލްޖިއަމްގެ އެންޓްވާޕްގައި ދިރިއުޅުނު އާޓް ކަލެކްޓަރެއް ކަމަށްވާ ސެމިއުލް ހާޓްވެލްޑްއާއި އޭނާގެ އާއިލާއަކީ އެ ދުވަސްވަރު ބާރުގެ ބޭނުން ކޮށްގެން އާއްމުން ލޫޓުވަމުން ދިޔަ ނާޒީންގެ ކިބައިން ސަލާމަތްވާން އެ ސަރަހައްދު ދޫކޮށް ދިޔަ އާއިލާއެކެވެ.

އެ ދިޔަ ދިއުމުގައި ސެމިއުލްގެ މިލްކިއްޔާތުގައި ހުރި ގިނަ ކުރެހުންތަކެއް އޭނާ ވަނީ އެ ތަނަށް ދޫކޮށްލާފަ އެވެ. ނަތީޖާއަކަށްވީ ނާޒީން އެތަކެތި ވަގަށް ނަގައި އެތަކެތީގެ މިލްކުވެރިކަން އަތުލައިގަތުމެވެ.

އެހެން ނަމަވެސް ނާޒީންގެ ވައްކަން ބަލަމުން އަންނަ އިނގިރޭސި ވިލާތުގެ ސަރުކާރު އިދާރާއިން ވަނީ މި ވައްކަން ބަަލައި އޭގެ ތެރެއިން އެއް ކުރެހުން ސެމިއުލްގެ ވާރުތަވެރިންނަށް ދޭން ނިންމާފަ އެވެ.

އިނގިރޭސި ކުރެހުންތެރިއެއް ކަމަށްވާ ހެންރީ ގިބްސް 1654 ވަނަ އަހަރު ކުރަހާފައިވާ އެ ކުރެހުމުން ފެންނަނީ ގްރީސްގެ އަޅުވެތިކަމުން ސަލާމަތްވާން އުޅުނު ބައެއްގެ ފުލޯކު ވާހަކަ އެކެވެ.

މި މައްސަލަ ބެލި އިނގިރޭސި ވިލާތުގެ އިދާރާއިން ބުނީ އެގައުމުގެ ދާރުލްއާސާރެއްގައި މިހާތަނަށް ބެހެއްޓިފައިހުރި އެ ކުރެހުމުގެ އަސްލު ހައްގުވެރިންނަކީ ހާޓްވެލްޑްސްގެ އާއިލާ ކަމަށެވެ.

އެޑޮލްފް ހިޓްލާ އިސްކޮށް ހުރެ ޔަހޫދީންނާ ދެކޮޅަށް ފެށި ނާޒީ އިންގިލާބުގައި އާއްމުންގެ އެތައް މުދަލަކަށް ގެއްލުންދީ ލޫޓުވާފައިވެ އެވެ.