ދެކުނާއި މެދުތެރޭގެ އަތޮޅުތަކަށް މިއަދު މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ.

އެ އިދާރައިން ބުނީ ދެކުނާއި މެދުރާއްޖޭގެ އަތޮޅުތަކަށް މޫސުން ގޯސްވާނެ ކަމަށް ލަފާކުރެވުނަސް އުތުރުގެ އަތޮޅުތަކަށް މޫސުން މިއަދު އާންމުގޮތެއްގައި ރަނގަޅުވާނެ ކަމަށެވެ. އަދި ދެކުނުގެ އެކި ހިސާބަށް ވިއްސާރަ ކުރާނެކަމަށް އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށް މެޓުން ބުނެ އެވެ.

މޫސުން ގޯސްވެ، ބޯކޮށް ވާރޭވެހޭނެކަމަށް ލަފާކޮށް މެޓް އޮފީހުން ވަނީ ރޭގެ ވަގުތުތަކުގައި ލ. އަތޮޅުން ފެށިގެން އައްޑު އަތޮޅަށް ހުދު ސަމާލު ނެރެފަ އެވެ. ހުދު ސަމާލުގެ ވަގުތު ވަނީ މިއަދު ހެނދުނު 6:30 ހަމައަށް ހަމަވެފަ އެވެ.

ކަނޑުތައް އާދައިގެވަރަކަށް މަޑުވެފައި، ދެކުނުގެ އަތޮޅުތަކަށް ދެކުނާއި ހުޅަނގު ދެކުނުން އަދި އެހެން ހިސާބުތަކަށް އުތުރާއި އިރު އުތުރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށް މެޓުން ބުނެ އެވެ. އަދި ރާޅުގެ އުސްމިން ހުންނާނީ 1 ފޫޓާ 4 ފޫޓާއި ދެމެދުގައި ކަމަށް ވެސް އެ އިދާރާއިން ބުނެ އެވެ.

މޫސުން ގޯސްވާނެ ކަމަށް ލަފާކުރެވޭތީ ހާއްސަކޮށް ކަނޑު ދަތުރުކުރާ ފަރާތްތަކުންނާއި އާންމުކޮށް ހުރިހާ އެންމެން ވެސް މޫސުމަށް ސަމާލުވުމަށް މޫސުމާ ބެހޭ ގައުމީ އިދާރާއިން ވަނީ އިލްތިމާސްކޮށްފަ އެވެ.